Shillong, Jylliew, 4: Ka Kynhun Myntri jong ka Sorkar Jylla ha ka sngi Balang ka la mynjur ban pyntreikam ïa ka Integrated Eco-Tourism Sustainable Agri-based Livelihood Development Project kaba kot 80 million dollar ban pisa da ka Asian Development Bank (ADB).
Ïa kane la pyntip da u Myntri Rangbah ka Jylla u Conrad K. Sangma hadien ba la wai ka jingïalang.
“Kane ka dei ka projek ba la ïarap nabar. Kane ka projek ha kaba sdang ka dei ka projek kaba shongdor 145 million dollar hynrei mynta ngi la pynduna ïa ka katkum ka jingtyrwa jong ka Sorkar India ban buh kyndon ïa ki projek bapher bapher kiba ïoh jingïarap nabar, kiba lah ban ïoh jingmyntoi da ka jylla, ngi la hap ban pynhiar ïa ka na ka 145 million dollar sha kumba 80 million dollar,” la ïathuh u Sangma.
“Ïa kane la leh namarba ka Sorkar India ka dei ka bor ba ngi hap ban pynphai 80% na ka ram ha ka kyrteng jong ki jylla na ka thaiñ Shatei Lammihngi bad na ki jylla rilum bad namar kata, ka Sorkar India ka sngew ba ki jylla kin shim ïa ka pisa hynrei ki hap ban pynphai biang ïa ka pisa bad kumta ki la rai ban buh ïa ka kyndon.
“Ka Meghalaya ka la shim T. 12000 klur bad hadien kata kaba la jan kot 9000 klur hap ban pynphai biang da ka sorkar India. Da kaba buh ïa kata ha ka jingmut, ngi la hap ban pynduna ïa ka,” u la ong ruh da kaba bynrap “kane ka projek kaba la pynrit ka dei ruh ka projek kaba mynta ngi la pynïar sha ki jaka bapher bapher kumta kan ym long tang ha kawei ka jaka hynrei kan sa saphriang kylleng ka jylla,” u la bynrap.
U la ong ba kane ka projek mynshwa la thmu tang ha ka thaiñ Sohra hynrei ka ADB ka la wan bad ong ba ka Sohra lehse kan ym lah ban pdiang lut ïa ka projek bad namar kata ngi la hap ban pynïar ïa ki jaka.
“Ki la ai jingmut ruh nalor ka kam jngohkai pyrthei kiwei pat ki bynta jong ka eco-tourism bad kumjuh na ka bynta ka rep ka riang ruh lah ban pynrung ha kane ka EAP. Kumta da kaba pynshong nongrim ïa kata ngi la pynkylla ïa ka jingheh jong kane ka projek bad mynta mynta ka sngi ngin sa kynthup lang ïa ka jylla baroh kawei,” la pyntip u Sangma.
Ka jingpynleit jingmut ha ka kam jngohkai pyrthei bad kumjuh ruh ha ka projek pynroi ïa ka kamai kajih kaba pynshong nongrim ha ka rep ka riang kan long na kane ka projek.
Ha kajuh ka por ka Kynhun Myntri ka la mynjur ban pdiang ïa ka Meghalaya Right to Information Rules, 2025.
U Sangma u la ongba ka jylla Meghalaya kam pat pdiang ïa kane ka Rule ba thymmai ba la mynjur da ka Sorkar Pdeng ha u snem 2012.
“Mynta ka sngi ngi la rai ban pynrung ïa ki bynta bapher bapher bad wanrah ruh ki jingpynkylla kiba ïadei bad ki Rule jong ka jong ka Sorkar India ïa kiba la pynkylla na u snem 2005 sha u snem 2012 bad ngi la pynrung ruh ïa ki jingpynkylla da kaba pynbeit thymmai ïa ki Rule lajong bad ban wanrah pat da ka Meghalaya Right to Information Rules, 2025 ba thymmai.,” la ïathuh u Sangma.
 | ReplyForwardAdd reaction |
