Shillong, Jylliew, 04: Ka Kynhun Myntri jong ka Sorkar Jylla ha ka sngi Balang ka la mynjur ban pyntreikam ïa ki projek pynmih bording bapher bapher.
Ka sorkar jylla kan sa ïasoi thymmai biang ïa ka Memorandum of Agreement (MoA) bad ka Athena Projects Pvt Ltd na ka bynta ka Kynshi stage-I ban pynmih ïa ka bording kaba 450 megawatt hadien ba ka la aidak ban mang pisa T. 14 klur na ka bynta ban pynmih kham bun ka bording na Riangdo Small Hydro Project kaba kot 6 megawatt nalor kaba pyntreikam ruh ïa ki ar tylli ki projek pynmih bording, kiba lah ban ai bording ei sha ka jylla kaba kot 12 percent.
Ha ka jingïakren bad ki lad pathai khubor hadien ba la wai ka jingïalang, u Myntri Rangbah ka Jylla Conrad K. Sangma u la ong, “ngi la rai ban ïaid shakhmat bad ka Kynshi stage-I bad ban ïaasoi ïa ka MoA bad ka Athena Projects Pvt Limited.”
“Ngin sa ïasoi ïa ka MoA bad ki ryngkat bad ki projek ba la sdang bad ban pynsdang noh ïa ka kam namarba ka Athena ka la leh ïa ka jingjurip na ka bynta kane ka projek (kaba la don ha ka jingeh la bun snem),” u la bynrap.
Haba ïathuh ïa ka tynrai jong kane ka projek, u Sangma u la ong, ha kaba sdang la ïasoi ïa ka Kynshi projek na ka bynta 450MW. Hadien ba la leh ïa ki jingjurip da ki tnad bapher bapher kynthup ïa ka jingpynlang ïa ka um, la sngewthuh ba kane ka projek kam lah ban tam palat ïa ka 270 MW.
“Namarba ïa ka projek la pynhiar na ka 450 MW sha ka 270MW ki la mih ki daw ba ïadei bad ka dor bad ka (Athena) la artatien ban ïaid shakhmat bad ka projek kam shym la ïaid shakhmat watla ka Athena ka ladep ban leh ïa la ka jong ka kamram nalor kaba ïakren ruh bad ki trai shnong, ban leh ïa ka Environmental Clearance, bad ïa ki jingdonkam bapher bapher. Ngi la la khot biang ïa ki dang khyndiat snem bad la kylli ruh lada ki dang don ka mon ki lah ban ïaid shakmat bad lada ki kyrngah ngin hap ban pyndam noh ïa ka projek.
Hadien ka jingïakren kaba bniah, ki la poi sha ka jingai jingmut ba ïa ka MoU lah ban wanrah ïa ka jingpynbeit thymmai ban kynthup ïa ka Pump Storage Project (PSP) bad katto katne ki bynta jong ka projek solar bad pynïaid ïa ka projek wah nangta kane ka projek ka lah ban long kaba lah ban treikam bad nangta ki la kyrpad ïa ngi ban pynbeit katkum ka jingpynkylla ïa ka MoA.
“Ynda ngi la peit kam lah ban long ban pynbeit thymmai ïa ka MoA namarba ki kyndon baladep ïasoi ki long tang katkum ka Technology kaba la don lypa,” ula ong.
Ha kaba ïadei bad ka jingshna pynheh ïa ka Riangdo Small Hydro Power Project, u Sangma u la ong ba ka tnat Bording ka la wanrah ïa ka jingtyrwa hadien ba la pule bniah na ka IIT Roorkee, la pyntip ba kane ka projek ka lah ban pynmih ïa ka bording na ka 3 MW haduh 6 MW.
“La pan pisa sa T.14 klur na ka Sorkar da ka tnat ban ailad ïa ka projek ban pynheh na ka 3 MW sha ka 6 MW bad ïa ka jingtyrwa la ai jingmynjur da ka Sorkar. Kane kan bynrap lang bad ka jingpynmih bording jong ka MeECL,” u la bynrap.
Shuh shuh shuh u Myntri Rangbah u la ïathuh ba ka Kynhun Myntri ka la mynjur ruh ïa ka jingtyrwa na ka bynta ban shna ïa ka Nongmer Small Hydro Project kaba lah ban pynmih bording 24 Mega Watt.
“Ïa kane ka projek yn sa bei pisa hi da ka kompeni. Ka kyndon ba la buh ka long ba ïa ka bording kaba mih yn thied beit tang da ka Sorkar Jylla. Katkum ka kyndon aiñ jong ka ri.
Ha kajuh ka por, u Sangma u la ong ba ka projek ha Umran la ithuh da ka JMB Aqua Private Ltd, kaba lah ban pynmih bording 13.5 megawatt. Ka sorkar ka la rai ban pdiang ïa kane ka jingmynur na ka bynta ban shna ïa ka projek pynmih bording ha Umran.
 | ReplyForwardAdd reaction |
