Shillong, Jylliew, 04: Ka Kynhun Myntri jong ka Sorkar Jylla ha ka sngi Balang ka la mynnur ban mang pisa sa T.30 klur na ka bynta ban siew dep ïa baroh ki jingsiew kiba ïadei bad ka jingshna ïa ka Ganol Stage-I Hydro Power Project ha West Garo Hills District.
Ha ka jingïakren bad ki lad pathai khubor u Myntri Rangbah ka Jylla Conrad K. Sangma u la ong ba ïa kane ka projek la shna pyndep bad ka Meghalaya Energy Corporation Limited (MeECL) ka la wanrah ïa ka jingtyrwa ban mang pisa sa T.30 klur khnang ban kiar na ka jingsiew bailutksan kaba kham heh ha ki snem ki ban wan namar ka jingsahteng ka jingsiew sha ki kynhun bapher bapher.
“..khnang ban kiar na kino kino ki jingsiew bailutksan ba kham heh, mynta ka sngi ka Sorkar ka la mynjur ban mang pisa sa T.30 klur ban pynkhuid lut ïa ka pisa ba dang sah jong ki kontraktor,” u la ong bad bynrap ba jingpynlut ban tei ïa ka projek ka la kot haduh T. 590.88 klur.
Ha kajuh ka por ka Kynhun Myntri ka la mynjur ruh ïa ka Meghalaya State Energy Conservation Fund Rules (MSECFR) 2025.
U Sangma u la pyntip ba kane ka Fund ka long kaba donkam na ka bynta kawei pa kawei ka jylla.
