Shillong, Jylliew, 06: U Working President jong ka UDP u Bah Titostarwell Chyne ha ka sngi Palei u la kynthoh tyngeh ïa u nongaiktien jong ka Voice of the People Party (VPP) u Dr. Batskhem Myrboh halor ka jingkynthoh jong u ïa ka jingiehnohkam jong u General Secretary barim ka UDP u Dr. Jemino Mawthoh.
Ha ka jingïakren bad ki lad pathai khubor u Bah Chyne u la ong, “ ka banyngkong, nga lyngngoh kaei kaba pynlong ïa u Bah Batskhem ban kynthoh nyngkong eh ïa ka jingiehnohkam jong u Dr. Jemino. Ngam sngewthuh ka mut aiu. Ka baar, balei yn hap ban da kynnoh ïa ka party jong ngi namarba ngi ngim don jingkynnoh eiei ïa ka party (VPP) jong u la mih ne rung mano mano ruh kam dei ka kamram jong nga ne jong u nongkren ka party ne ka kamram jong ki nongkitkam ka party jong ngi ban kynthoh eiei ïa ka party jong kiwei. Ngi don la ki jong ki nongrim, ngi don la ki jong ki saiñpyrkhat, ngi don la ka jong ka bor kaba u paidbah u la ai ha ngi.”
“Ngi sngewba ka jingong jong u Bah Batskhem halor ka jingpynmih ïa ka kyntien ba ka party (UDP) ka long ka bym don jingsngew, kaba shim kabu, nga sngew ba ka long kaei kaei kaba ngim lah ban pdiang,” la ong u Bah Chyne.
Halor ka jingong ba ïa ka UDP yn ym don ba sngap shuh ha u snem 2028, u Working President ka UDP u la ong, “(ka pynpaw) ba ym long eiei shuh ha u 2028. Nga lyngngoh ba u Bah Batskhem u la long nongïathuh lypa naduh mynno? U dei u nongaiktien ne u nongïathuh lypa jong ka VPP?
“Kum u rangbah nga sngew ba um dei ban kren kum kine ki kyntien. Kum ki nongtrei ngi don la ka jong ka bynta, kum ki dkhot ha ki seng saiñpyrthei bapher bapher ngi burom iwei ïa iwei. Tang kawei kaba nga kwah ban pynsngew ha kane ka por ba ka UDP kam dei ka party kaba dang mynnin (hynrei) ka dei ka party kaba la suit la shor naduh ka por jong ka APHLC, hadien ka mih ka HPU, hadien ka HPU ngi la ïatylli lang ka HPU bad shi bynta jong ka HSPDP bad ka PDIC ban pynkha ïa ka UDP,” u la ong.
“Ka UDP da kaba burom ïa kiba bun ki riewrangbah, bun ki MLA, ki MDC ka la sei. Wat u President jong ka VPP ruh u dei u dkhot (barim) jong ka UDP. Kam mut tang haba don mano mano ba mih na ka party, ka party kan jah. Shibun kiba la mih na ka UDP, kiba bun ki MLA bad ki MLA barim ki la mih hynrei ki nongïalam ki wan bad ki leit katba ka party ka neh. Ka neh namarba ngi don la ka jong ka saiñpyrkhat, ka nongrim bad kata ka shong ha ngi kum ki nongïalam, ka shong ha ki briew kiba don ha ka party,” la bynrap u Bah Chyne.
“Ngim ju ong ïa kano kano ka party ba ka sniew ne ba ngin kynthoh ïa kiwei pat ki party. Ka shong ha ki nongïalam bad ka shong ha ki nongïalam ki long kiba kumno. Nga sngew ba ka jingkren jong une u rangbah (Dr. Batskhem) ka long kaei kaei kaba ngim lah ban pdiang,” la pynkut u Bah Chyne.
