Shillong, Jylliew, 07: Ka Shillong Cricket Association ha kane ka kynti ka la pynkha ïa ka Shillong Cricket Academy (SCA) ban ai jinghikai ïa ki khynnah kiba don sap ha ka jingïalehkai Cricket.
Ka jingthmu jong ka Shillong Cricket ban seng ïa kane ka Academy ka long ban plie lad plie lynti ïa ki khynnah Khasi shynrang bad kynthei kiba don ïa ka sap ïalehkai Cricket kiba la kynjoh ïa ka rta kaba 8 snem haduh 18 snem.
Na ka liang jong ki nongpynïaid bad ki Coach ki la kren bynñiaw na ka jingduna palat ki khynnah Khasi kiba wan shakhmat ban ïashim bynta ha ka jingïalehkai Cricket namarba haduh mynta kiba bun hi ki dei ki khynnah na kiwei ki jaidbynriew.
