Munich, Jylliew, 10: Ka jingïakhun jong ka India ha ka ISSF Pistol & Rifle World Cup ha Munich la sdang da ka jingjop kaba sngewtynnad hadien ba ka Elavenil Valarivan, 25 snem ka rta ka la ïoh khur ïa ka takma Rnong ha ka lympung 10m air Rifle ki kynthei ha ka sngi Ba-ar.
Kane ka jingjop ka pyni ruh ia ka jingïaid shaphrang jong ka hadien ba ka la wan ha ka kyrdan ba saw ha u snem 2018 ha kajuh ka jaka.
U Vice President jong ka National Rifle Association of India (NRAI), Bah John F Kharshiing u la pynpaw ia ka jingsngew sarong halor kane ka jingjop jong ka Elavenil.
U ong, “ka jingjop jong ka Elavenil ka ai mynsiem bad ka pynmih ka jingsngewskhem ha ka kynhun India ha kane ka jingïalehkai kaba heh ha pyrthei.” kumba 76 tylli ki Ri Ka pyrthei ki ia shim bynta ha kane ka World Cup.
Shwa kane, u Bah Kharshiing u la poi ban jngoh ia ka Olympic Schießanlage – ka jaka ialeh Kai ia siat kaba la tei na ka bynta ka Olympic ha u snem 1972 – ryngkat bad u Sports Scientist ba pawnam u Dr. Pierre Beauchamp, PhD, u High Performance Director (HPD) jong ka NRAI bad u nonghikai ba pawkhmat ha ka jingïalehkai ia siat ha ka pyrthei. Ha ka sngi 9 June 2025, ki la leit peit ia ki jaka ia siat 10m, 25m, 50m bad ka final hall, ha kaba ki la ïakren bad ki nongïalehkai, ki coach bad ki nongpyniaid Ka team India ban ïohi kumno ka jingïapynkhreh ki treikam bad ban pynshlur ia ki samla.
Ka bynta kaba khraw ha kane ka jingleit jurip ka long ka jingshim lad ban ioh ia ka jingïakren kaba bniah hapdeng u Vice President National Rifle Association of India bad u Dr. Beauchamp halor ka jingpynkhreh na ka bynta ka 39th National Games 2027 kaba yn pynlong ha Meghalaya.
U Dr. Beauchamp u la pynpaw ia ka jingkular ban kyrshan bad ai jingmut halor ka jingpynneh pynsah bad ka roi ka par jong ka jingïalehkai shooting ha Meghalaya bad ki bynta jong ka thaiñ Shatei Lam Mihngi, namar ka jingdon bun jong ki samla ba thrang ban ïalehkai bad ka jingïaroh ia ka sap.
U la kular ba ha ka jingïatreilang bad ka NRAI, un ai jingtip na ka jinglong nonghikai jong u bad ai jingmut kumno ban tei ia ka kynhun kaba khlaiñ bad kaba lah ban ïakhun ha ka lympung National Games.
U Dr. Beauchamp u la pynpaw ba ka long kaba jwat ban jop medal ha ki lympung World Cup bad khatam ha ka Olympic. U la pynpaw da ka nuksa ba ka jinglah ban poi sha ka takma ka donkam:
“Ban poi sha ka takma ha ka lympung World Cup lane Olympic ka donkam ïa ka jingïai neh ka jingtrei shitom, ka jingsngewshlur(mental fitness) jong ka mynsiem bad ka jingiarap kaba biang. Ki nongïalehkai ki dei ban long kiba la pynkhreh na baroh ki liang ban lah ban ïalehkai ha ka kyrdan national bad international,” u la ong.
Ha kane ka jingleit, u Vice President ka NRAI u Bah John Kharshiing u la ïakynduh ruh ia ka Ms. Manu Bhaker, ka Olympian kaba la rah ar takma rnong ha ka Olympic ha Paris 2024. Ka Ms. Bhaker ka la pynpaw ka jingsngewkmen halor ka jingangnud ban tei noh ïa ka jaka ia lehkai ia siat (shooting range) ha Shillong, bad ka la kylli lano yn pyndep ban tei ïa kane ka jaka namar ba ka kwah ban pynlut por ha katei ka jaka ba itynnad ban ïai trei shitom na Ka bynta ban pyntbit is lade. Ka la kyntu ruh ïa ka Sorkar Meghalaya ba kan ai jingïarap ban tei ïa ka jaka jingïalehkai shooting kaban long athlete-friendly, kumjuh kumba don ha Munich, Seoul bad kiwei ki jaka ha pyrthei.
