Shillong, Jylliew, 14: U Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong u la ong ba ka Sorkar ka dang plie ïa ka jingkhang na ka bynta ka jingïakren ïasuk bad ka seng kieng atiar Hynñiewtrep National Liberation Council (HNLC) ba la shah khein beaiñ tangba ka Sorkar kan ym long nongpeitkai ïa ki kam runar ruser ba la leh da ka HNLC.
Kane ka jubab jong u Bah Tynsong ka long haba jubab ïa ka jingkylli halor ka jingkynnoh ba ka HNLC ka dang ïai bteng ban sam ïa ki shithi dawa pisa sha ki nongkhaii.
Ha ka jingïakren bad ki lad pathai khubor u Bah Prestone u la ong ba ka sorkar jylla haduh mynta kam pat ïoh ktien eiei na ka HNLC wat hapdeng ki jingïai kyrpad ban pynsdang biang ïa ka jingïakren ïasuk.
U la ong ba ka jingkhang jong ka Sorkar ka dang ïai plie na ka bynta ka jingïakren ïasuk bad ka HNLC ban ïakren pynbeit hapoh ka miej ïakren.
“Haoid, ka jingkhang ka dang ïai plie lada ki long kiba la khreh ban wan sha ka miej jingïakren, ka Sorkar Jylla ka dang plie ïa ka jingkhang. Ym tang ka jylla hynrei wat ka Sorkar Pdeng ruh,” la bynrap u Bah Tynsong.
Halor ka jingkynnoh ïa ka jingdonkti ka HNLC ban sam ïa ki shithi dawa pisa sha ki nongkhaii, u Symbud Myntri Rangbah u la ong, “kino kino ki jingjia, ngi leh la ka jong ka kamram ban pynthikna ba kin ym jia.”
“Kata ka dei ka kam kaba dang ïaid shakhmat, ka sorkar kam lah ban shu long tang ka nongpeitkai. Ngi dang leh la ka jong ka kamram ban pynthikna ba kan ym don kano kano ka jingsam ïa ki shithi beaiñ sha kino kino ki briew,” la kular u Bah Tynsong.
Ha ka 3 tarik Kyllalyngkot, 2024, ka HNLC ka la pynbna ïa ka rai ban weng noh na ka jingïakren ïasuk kum ka jingpyrshah ïa ka jingbym lah jong ka Sorkar ban shimkhia halor ki mat jingdawa ba hakhmat eh kaba kynthup ïa ka jingmap ei ïa ki dkhot bad ban weng noh ïa ka jingkheiñ be-aiñ.
Ka UAPA tribunal dang shen ka la rai ban kyrshan ïa ka rai jong ka Ministry of Home Affairs kaba pynbna ban kheiñ beaiñ ïa ka HNLC sa na ka bynta san snem kum ka seng be-aiñ.
Ha u bnai baladep, u Chief Secretary ka jylla Bah Donald P. Wahlang haba jubab ïa ka jingkylli halor ka jingdawa jong ka HNLC ban ai ïa ka jingmap ei shwa ban ïaid shakhmat ïa ka jingïakren u la ong, “kata dei ka mat kaba ngi donkam ban ïakren haba ngi shong ha ka miej ïakren bad lada kim wan ban ïakren kumno ngin lah ban shim ïa ka rai khlem da ïathir ïatai bad ngi kyrpad ïa ki ban wan shakhmat bad to ngin ïakren bad ban poi sha ka jingpynkut kaba thikna.”
