Shillong, Jylliew, 15: Kum shibynta ban pynkhreh ïa ki nongïalehkai ïa ka rynsan ïakob khun kti ki ban ïashim bynta ha ka National Arm Wrestling Championship 2025, ka ban sa long ha Thissur, Kerala ka ban sdang naduh ka 28 tarik u Jylliew haduh 2 tarik, Naitung 2025, ka Meghalaya Arm Wrestling Association (MAWA) ha ryngkat ka jingïasnoh kti lang ka Dorbar Shnong Mawlai Nongkwar ha ka sngi Saitjaiñ ka la pynlong da ka jingïakob khun kti kaba tang shi sngi kaba la tip kum ka Street Arm Fight, kaba long ha India Bazar premise Mawlai Nongkwar.
Ki don 14 ngut kynthei bad 20 ngut ki shynrang ki ban mihkhmat ïa ka jylla Meghalaya ha ka National Arm Wrestling Championship 2025 ka ban sa long shen.
Ha kane ka sngi la pynkup burom ruh ïa ki lai ngut kiba la warnah burom ïa ka jylla Meghalaya da u Rangbah Shnong ka Mawlai Nongkwar u Bah Moon Rumnong ryngkat ka jingdon lang ki nongkitkam ka Seng Samla Mawlai Pyllun bad kiwei kiwei.
Kine ki lai ngut kiba la shah pynkup burom ki long u samla Pyndapbor Dkhar uba la jop ha ka Overall Men’s Bermuda, Pro Card & 2nd place ha ka Junior Body Building ha SAARC Bodybuilding Championship, u Bah Alexion Roy Mylliem Umlong uba ïoh khur ïa ka takma Rupa ha ka Asian Arm Wrestling Championship 2025, kaba long ha nongbah Delhi bad ka ka samla Ïamonlang Kharjana ka nongshad Hiphop ba la paw bha hakhmat ka ri India.
