Shillong, Jylliew, 15: Ki dkhot ka Hynniewtrep Youth Development Council, (HYDC) Seng Kmie hapoh ka jingïalam jong u President u Bah Wyraiwan Sohtun ha ka Sngi Saitjaiñ ki la hiar tohkit ïa ki karkhana kiba don ha ka thaiñ Byrnihat, Ribhoi District ban wad jingtip la ki karkhana ki pyntreikam neem ïa ka Meghalaya Industrial and Investment Promotion Policy 2024 ban aikam aijam ïa ki trai ri trai muluk bad ha kajuh ka por ki pyntreikam neem ïa ka Minimum Wages Act 1948 (Central Act XI of 1948) kumba la pynthymmai da ka Sorkar ban siew da ka dor kaba biang sha ki nongtrei naduh kiba dang sdang trei bad kiba la tbit ban trei ïa ki kam ki jam.
Ki dkhot ka seng ki la tah ruh da ki kot lyngkdop ba la pynmih da ka Sorkar lyngba ka tnad Labour bad ka tnat Commerce and Industries ha kaba ïadei bad ka jingthungkam ba dei ban kham phai khmat kham bun sha ki trai muluk ha ki shlem sengkam bad kumjuh ruh ban siew da ka dor kumba la buh da ka Sorkar.
