Shillong, Jylliew 15: U Myntri ka sorkar pdeng uba khmih ïa ka tnat Road Transport & Highways u Nitin Gadkari ha ka sngi U Blei u la pynbna ïa ka jingmang tyngka kaba T. 951.21 klur na ka bynta ban shna ïa ka surok Tura bypass, ka ban pynïar na NH-127B sha NH217.
Haba kren ha ka X, u Gadkari u la ong, “Ha Meghalaya, ngi la mang kumba T. 951.27 klur na ka bynta ban shna ïa ka surok Tura Bypass, ka ban pynïar NH-127B shaduh NH-217, ban shna ïa ka 2-lane ka ban pynwandur ïa ki jingshna kiba bun rukom. Kane ka project, ka ban ïar na baroh ki liang kaba la buh kumba 29.03 kilometre ha Tura district, kadei ka kam kaba kongsan bha.”
U la ong ba ka NH-217 kaba la tip mynshwa ka NH-51 ka la long ka surok kaba kongsan kaba pynïasoh ïa ka Guwahati shaduh Dalu, kaba don ha khappud ka ri India bad Bangladesh bad kaba treikam kum ka inland customs check-post.
“Kane ka surok bypass kaba la buh ka jingtyrwa kan sdang najan ka shnong Sanchonggre kaba hab ha ka NH-127B bad ka ban kut pat ha ka shnong Jenggitchakgre ka NH-217. La pynwandur ïa ka ha ka jingai laiñ jong ka NH-217, ka ban ïaid lyngba ka sor kaba khapngiah kaba dei na Sor Tura, kaba ka don ka jingsurok kaba khapngiah bad kumjuh ruh ka jingbun ka dheng kali bad kaba ktah ïa ka ïaid ka ïeng ki paidbah,” ïathuh u Myntri.
“Kane ka jingshna ïa kane ka surok ym tang ba kan pynkylluid ïa ka jingkhapngiah hapoh ka shnong Tura hynrei kan ai ka jingïada da kaba pynïakhlad ïa ka jingïaid ki kali hapoh ka shnong na ka jingkhap ngiah kaba ju jia manla ka por,” u la bynrap.
