Shillong, Jylliew, 20: U Principal Accountant General (A&E), Meghalaya, Shillong, ha ka jingïatreilang bad ka tnad Finance (Pension Cell) jong ka Sorkar Meghalaya, ki la pynlong ïa ka Adalat Pension kaba seisoh bha ha ka sngi Palei ha Basic Training Centre, Malki, Shillong.
Kane ka sienjam ka thmu ban pynbeit ïa ki jingeh kiba la slem bha kiba ïadei bad ka bai bam tymmen jong ki nongtrei sorkar kiba la shongthait ha ka rukom kaba shai bad ha ka por kaba biang.
Ha kane ka Adalat, la peit haduh 85 tylli ki mukotduma bai bam tymmen kiba la sahkut slem bha ban bishar bniah. Ha kane ka sngi la wan ban ïashim bynta da ki Drawing and Disbursing Officer (DDO), ki nongïoh bai bam tymmen, bad ki ophisar kiba dei peit ïa ka jingpyntreikam ïa ka bai bam tymmen. La bishar bniah ïa kawei pa kawei ka case bad la pynshisha ïa ki kot ki sla kiba ïadei ha ka jingdon lang ki briew kiba don bynta ha kane ka kam.
Ka Pension Adalat ka la long kum ka rynsan ban ïakren kaba laitluid bad ban pynbeit mardor ïa ki katto katne ki mukotduma kiba eh. La ai jingmut sha ki heh jong ka tnad kam pla tyngka bad ki DDO halor ka jingpynkylla bad pyntreikam hok ïa ki kyndon ba ïadei bad ki Pension Rules. Katto katne ki mukotduma, kiba la sah khlem lah ban pynbeit la slem mynta, ki dei kiba la pynbeit bha ha ka por ba pynlong ïa kane ka jingïalang.
Hynrei la lap ruh ba ha ki katto katne ki khep, wat hapdeng ka jingbuddien bunsien da ka tnad kam pla tyngka (Pension Cell) bad ki DDO bapher bapher, ym shym la lah ban lap ïa u briew ba dei ban ïoh ïa ka bai bam tymmen. Ïa kine ki case dei ban khein kum kiba la pyndep, katkum ka jingmynjur jong ka tnad kam pla tyngka.
Ka mat ba kongsan kaba la pynpaw ha ka por jong ka Adalat ka long ka jingpynslem ban pynbeit ïa ka bai bam tymmen namar ka jingbym aiti ïa ki phom thep kyrteng da ki nongtrei ha ka por ba ki dang don ha ka jingshakri. Ka jingbymdon jong kine ki kot ki sla kiba kongsan ka la wanrah ïa ki jingeh kiba lah ban kiar ha kaba pyntreikam ïa ki jingdawa bai bam tymmen. U Principal Accountant General u la ban jur halor ka jingdonkam kyrkieh ban shim ïa ki lad jingïada bad u la ai jingmut ba ka tnad pla tyngka kan pynmih ïa ki jingbthah sha baroh ki DDO ban pynthikna ba dei ban lum ïa ki nomination form na baroh ki nongtrei sorkar shwa ba kin shongthait.
Baroh kiba ïadon bynta ki la ïaroh ïa kane ka jingïalang bad ki la ong ba ka long kum ka sienjam kaba bha ban pynbeit ïa ki jingeh bad ban kyntiew ïa ka jingseisoh bad ka rukom treikam kaba ïadei bad ka kam bai bam tymmen ha ka jylla.
