Shillong, Jylliew 22: U MDC ka BJP na Tura u Bernard Marak u la buh ka jingkylli ïa u Myntri Rangbah ka jylla haba ïadei bad ka jingjah ka bai bam Scholarship Scheme kaba T. 6 hajar tyngka.
Ha ka kyrwoh khubor u MDC u la ong ba ka Chief Minister’s Ccholarship na ka bynta ki samla pule post matric lah siew duna bha bad kam ïahap bad ka jingkular da u Myntri Rangbah u Conrad K Sangma ha ka Dorbar Mang Tyngka ba ladep.
U la ïathuh ba u Myntri Rangbah u Conrad K. Sangma u la pynbna ha ka 5 tarik, Lber ba ki samla pule Post Matric kin ïoh ïa ka Chief Minister Scholarship Scheme kaba T. 6,000 iwei pa iwei kaba long ruh ka pisa bynrap na ka Central Scholarship. Ïa kane ka jingpynbna la pyntip ha ka Dorbar Mang Tyngka hhynrei kane ka la pynpangnud haba ki samla pule ki la ïoh duna na ka T. 6,000/- kaba dei na ka CM Scholarship Scheme.
“Kane ka pisa kaba la pynrung ha ki Account jong ki samla pule ka la long kaba duna bha bad kam ïahap kumba la pynbna ha kaba kane ka la wanrah ka jingkylli kaba dei ban wanrah sha ka miej treikam jong u Myntri Rangbah ba ka dei ban pynshai. Ki la don ruh bun ki jingkylli na ki samla pule na ki College bapher bapher ba ki la sngewphylla ba ki la ïoh tang T. 1,500, ki don kiba ïoh T. 2,000 bad katto katne T. 3,000. Ki la don ruh kiba ujor ba ka pisa kam shym la paw ha ki Account jong ki,” la kam u MDC ka Tura.
U la ong ruh ba kane ka la pynkulmar bad buh ka jingartatien ïa ki samla pule.
U la ong ruh ba kan long ka jingïaroh lada ka ophis u Myntri Rangbah kan shimkhia ïa kine ki jingeh kiba ïadei bad ka jingsam ïa ka CM Scholarship Scheme khnang ban lah ban pynbeit ïa ki jingeh bad ba ki samla kim dei ban mad ki jingeh hadien habud bad ba ka jingsam ïa kane ka scholarship ka dei ban poi hok sha ki samla pule kaba long 6 hajar.
