Shillong, Jylliew, 23: Ka Dorbar ki Waheh Kur Ri Jaiñtia ka la dawa ïa ka Sorkar Jylla ba kan pyndam noh ïa ka kyntien ‘Synteng’ bad ruh ïa kiwei ki jaitbynriew bym dei ki trai ri trai muluk ka Meghalaya na ka thup ka Schedule Tribe Order 1950.
Ïa kane ka rai, ka Dorbar ki Waheh Kur Ri Jaiñtia, ka la shim ha ka jingïalang kaba la long ha Iungwalieh ka Chilliangraij ha ka sngi Saitjaiñ jong ka taiew ba ladep.
Ka Dorbar ka la rai ruh ban kyrpad biang ïa ka Jaintia Hills Autonomous District Council (JHADC) ban lum ïa ka Dorbar ki Waheh Kur Ri Jaiñtia na ka bynta ban shna ain noh ïa ki Kur kiba ladep pynrung sha ka District Council.
Ha ka jingïalang kaba la pynïaid da u President u Bah K. Lamsalanki Pariat, ka Dorbar ki Waheh Kur Ri Jaiñtia ka la pynpaw ruh ïa ka jingsngewdiaw halor ka jingbym ithuh jong ka District Council ïa ki Kur, ki Waheh Kur bad ki Seng Kur.
Shwa ban pynkut ïa ka jingïalang la jied pynthymmai ruh ïa ki nongkitkam na ka bynta ka samoi jong u snem 2025-2027 ha kaba la jied President ïa u Bah Khroo L. Pariat, Vice President Bah Pyrkhat Shylla bad Bah Jesper Bareh, General Secretary Bah G. H Bareh, Assistant Secretary Bah Kitlang Lato, Bah Kmenlang Myrchiang bad Bah Carmel Suchiang, Treasurer Bah Abut N. Muksor, Adviser Bah Erwin K. Syiem Sutnga bad Bah Shell Sing Langi lem bad 10 ngut ki Executive Member.
