Shillong, Jylliew, 25:U nongjop ïa ka Guinness World Record Bah James Syiemïong ha ka sngi Balang u la ong ba ka jingthmu jong u ban phah ïa ka jingtyrwa na ka bynta ban shna ïa ka Raja Memorial Viewpoint ha Sohra kam shym dei satia ba u thmu ban pynsngewsih ïano ïano ne ban pynrung ïa ki jingsawa saiñ hima sima, hynrei ban tyrwa ïa ka dak na ka bynta ka hok, ka jingshngaiñ jong ki nongjngohkai pyrthei bad ka jingpynsngewthuh paidbah.
Ïa ka jingtyrwa u la phah hi shimet dang shen ban pynpaw ïa ka jingangnud kum ka jingkynmaw burom ïa u Raja Raghuvanshi — u nongjngohkai pyrthei uba la shah pynïap.
Ka jingpynshai jong u ka long shisngi hadien ba ka BJP ka la ong ba ka party kam don bynta eiei bad ka jingtyrwa shimet jong u Bah Syiemïong, uba dei u dkhot ba la rim jong ka party.
“Ka jingthmu jong nga kam shym dei satia ban pynsngewsih ïano ïano ruh ne ban pynrung ïa ki jingsngew jong ka saiñhima sima, hynrei ban ai ïa ka dak na ka bynta ka hok, ka jingshngaiñ jong ki nongjngohkai pyrthei, bad ka jingpynsngewthuh paidbah,” ong u Syiemïong ha u kyrwoh.
U la pynpaw ïa ka jingsngew bynñiaw ba ka jingtyrwa jong u la shu thad paidbah khlem ka jingtip jong u bad ka la kylla long pynban ka mat ïakren kaba la shah kynthoh bad shah takraiñ na kiba bun ki liang.
“Ban kren beit, nga don ka jingsuba. Ka paw ba ka jingpyllait tuh ka dei kaba la leh khnang da ki briew ki bym lah ban tip ban ïalam bakla ïa ka jingmut jingpyrkhat jong ki paidbah bad lehse ban pynsniew ïa ka dur jong kawei ka seng sainpyrthei, watla kane ka jingthmu baroh kawei ka dei ka jingpyrshang shimet jong nga hi,” u la kynnoh.
U Bah Syiemïong u la ong ba um shym la aibor ïano ïano ruh pynphriang paidbah ïa ka jingtyrwa jong u namarba um don jingthmu ban wanrah ïa ka jingïadon bynta bad kano kano ka seng saiñpyrthei bad ka jingpyrshang ban pynïasoh ïa kane ka kam sha ka politik ka paw ba ka dei ka jingthmu kaba heh bad ka jingïasuhbuit ban pynmong ïa ka jingsngew jong ki paidbah.
Kumba ong ka pharshi Khasi, “U Hati dang sha khlaw” ka jingshisha kam pat dei ban mih shabar.
U la ong ba u long uba kloi ban ïakren bad kino kino ki kynhun, kynthup ruh ïa ki riewpaidbah.
