Shillong, Jylliew, 26: Ka jingtem Duitara ka la khring ïa ki khmat jong kiba bun ki nongrwai bad ki nongtem kiba wan nabar ka jylla Meghalaya ban ïashim bynta ha ka tamasa rwai tynrai ba la tip kum ka Rasong National Tribal Music Festival 2025 kaba la long ha U Soso Tham Auditorium, Shillong ha ka 26 tarik Jylliew, 2025.
Kine ki Duitara ki dei kiba la shna da ki kti jong u Bah Pynshailang Lyngdoh Mawphlang uba shong basah ha ka shnong Mawphlang ïa kiba u la wanrah khnang ban pyni paidbah ïa kane ka jingtem ksai kaba ki Khasi ki ju pyndonkam naduh hyndai hynthai ban sneng ban kraw lyngba ki sur jingrwai ïa la ki khun ki pyrsa kiba ju ïalum manla ka janmiet sawdong ka lyngwiar dpei.
Katkum ka jingsngew jong u Bah Pynshailang, ïa kane ka jingtem la i donkam ban pynrung mynta ha ki skul bad ki kolej khnang ba ki khynnah bad ki samla ha kane ka pateng kaba mynta kin dup tip bad kin dup nang kumno ban pynneh pynsah ïa ka duitara kaba long ka matti ki longshwa.
I kong Silbi Passah, i longkmie ba la pawbha ha ka imlang sahlang bad iba la ïoh ruh ïa ka khusnam Padma Shri i la ïaroh ïa u Bah Pynshailang uba la shna ïa ka duitara namarba ka jingdawa ïa kane ka jingtem ksai ha kum kane ka por ka jur bha.
