Shillong, Jylliew 28: Ki Pulit kiba don ha ka kamram ïaid pahara ha ka 24 tarik mynta u bnai ki la lap kumba 5 ton ba la suba ba dei u dewïong ba shu tih beaiñ ba la lumthup ha ka jaka ïohi paidbah hapoh ka shnong Sohkymphor, East Jaiñtia Hills bad la ong ba u dei u dewïong ba khlem ïohbor ne ba don ki kot ki sla kiba biang.
Hadien ïa u dewiong la kurup bad la pynkynriah noh sha Kongong na ka bynta ka jingtohkit kaba shngaiñ.
U Company Commander, ka tnat shipai BSF 4th Battalion BOP Dawki, West Jaintia Hills u la ujor sha ki Pulit ba ha ka janmiet 23 tarik bad 24, tarik mynta u bnai, ki runar bym lah ban ithuh na ka shnong Bakur, West Jaintia Hills ki la hylla, ki la pynthut ïa ki shipai BSF katba ki dang leh la ka jong ka kamram da kaba khang ïa ki shipai BSF ban rung shapoh ka ïew kaba don ha kane ka shnong bad kumjuh ki la pyrshang ban knieh ïa ka mobile phone jong uwei u shipai BSF, ha ka por ba ki dang record video ïa kane ka jingjia.
U SPM ka Nongpoh Post Officer (RB) u la ujor sha ki Pulit ba ha ka 27 tarik Jymmang, 2025, ar tylli ki speed post parcel la book na Nongpoh Post Office; hynrei ha ka 10 tarik u Jylliew, ïa ki parcel la pynphai biang sha ka Post Office na ka daw ba la shah kyntait ne ka jingbym biang pura ka jaka sah bad u phone number ba biang.
U SPM uba la ujor u la suba ba kine ki song ki lah ban don ki tiar ba don jingma kum ki kynja jingdih basniew.
U Lahinath N Sangma bad u Jecky B Marak ki la ujor lang ban pyntip ba ha ka 23 tarik mynta u bnai ha ka por kumba 10:00 baje mynstep, ki runar bym lah ban ithuh ki la thang ïa kawei ka Scooter kaba don u nombar ML-07B-7364 kaba dei trai da u Lahinath N Sangma bad ki runar ki la pynjulor ruh sa ïa kawei pat ka Scooter kaba don u nombar ML-07-2603 ba la long trai da u Jecky B Marak ha ka thaiñ Rongbinggre, East Jaiñtia Hills.
