Shillong, Jylliew, 30: Ka All Meghalaya Kick Boxing Association (AMKBA) ha ka lah Sngi u Blei ka la pynbna paidbah ba kan pynlong ïa ka 1st State Level KickBoxing Championship ha ka 12 tarik bad 13 tarik Nailur, 2025 kum ka jingrakhe ïa ka jingdap 10 snem jong ka seng.
Ha ka jingïakren bad ki lad pathai khubor, u President jong ka Association u Bah Samuel Hashah u la pyntip ba ka jingpynlong ïa kane ka rynsan ïakura ka long ruh kum shi bynta ban plie lad ïa ki khynnah kiba don sap ha ka jingïalehkai Kick Boxing.
U la khot bad wer ïa baroh ki Club bad ki Association bapher bapher naduh ki skul ki college khamtam ïa ki khynnah shynrang bad kynthei ban ïashim bynta ha kane ka rynsan ïakhun KickBoxing Championship.
U ong ba kito kiba kwah ban ïashim bynta ha kane ka jingïalehkai ki la ban phah ïa ki kyrteng ha u mobile number 8731022338.
Kum u nongïalam ka seng, u Bah Hashah u la kyntu ïa ki paidbah kiba ieid ïa ki jingïalehkai sports ba kin sngewbha ban ïarap lang ïa ka kynhun bad kumjuh u la kyrpad ïa ka Sorkar Jylla lyngba ka tnad Sports & Youth Affairs ban ïarap lem ïa ka kynhun khnang ba ka jingpynlong ïa kane ka rynsan ïalehkai kan long kaba jop.
