Shillong, Naitung, 01: Ka Sorkar Jylla ka la rai ban kyrpad ïa ki bor pynïaid jong ka skulbah North Eastern Hill University (NEHU) ban pdiang ïa ka jingïapynbeit shabar ka iingbishar ha kaba ïadei bad ka Bijini Complex kaba don ha Laitumkhrah, Shilllong
Ïa kane la pyntip da u nongaiktien ka Sorkar Jylla u Bah Paul Lyngdoh ha ka jingïakren bad ki lad pathai khubor hadien ka jingïakynduh ïa ki nongïalam ka Khasi Students Union (KSU) ha ka sngi Baar.
U Bah Paul u la ong ba ka jingïakren hapdeng ka Sorkar bad ka ki nongïalam ka KSU ka la long kaba seisoh, halor ka jingpynpaw shaphang ka jingsahteng jong ka ishu Bijini Complex.
Katkum ka jingong jong u, kane ka kam mynta ka long kum ka jingkheiñ dewthala ban ïakren, namarba u Registrar ka NEHU u la ujor sha ka Iingbishar Meghalaya High Court halor ka jingshim rai jong ka Sorkar ban shimti ïa ka Complex.
“Ka Sorkar ka la kyrpad ban ïakynduh hapdeng u Myntri ka tnat Pule Puthi bad ka Pro. Vice Chancellor jong ka NEHU ban ïakren la kumno kumno ban ïa pynbeit shabar jong ka Iingbishar, ïa kaba la ïasaid ruh da ka KSU,” u la bynrap.
Haba kylli, u Bah Paul u la ong, “ki kot ki sla kiba kongsan (ha kaba ïadei bad ka Bijini Complex) ym lah satia ban lap bad mynta ka kam ka don hapoh ka Iingbishar Meghalaya High Court.”
Halor ka mat jong ka North Eastern Indira Gandhi Regional Institute of Health and Medical Sciences (NEIGRIHMS), u Bah Paul u la ong ba kawei ka rai kaba la shim mardor ka long ban buh ïa ki jaka thoh eksamin Online ha kane ka jylla Meghalaya. Ka NEIGRIHMS ka la jubab ïa kane ka jingthmu bad ka la tyrwa ruh ban buh ïa ki Centre ha Shillong, Tura, bad ha Jowai.
“Ka KSU ka la pdiang sngewbha ïa kane ka sienjam bad ka Sorkar kan sa rah ïa kiwei pat ki mat kiba dang sahteng bad u Myntri ka Sorkar Pdeng, ryngkat ka jingkyrshan bad ka jingïatreilang jong ka Myntri ka Koit ka Khiah,” u la bynrap.
