Shillong, Naitung, 01: Ka seng kieng atiar Hynñiewtrep National Liberation Council (HNLC) ka la byrngem ïa u trai jong ka dukan die dawai ha Khyndai Lad ba la tip kum ka Economic Pharmacy ba khang khyrdep mardor ïa ka dukan bad ba u dei ban mih noh mardor na ka jylla Meghalaya nalor kaba byrngem ba lada u dang nud ban shong ban sah un ym ïoh shongsuk satia.
Ka HNLC ka la pynmih ïa kane ka jingbyrngem lyngba u kyrwoh ba la phah da u General Secretary u Bah Saiñkupar Nongtraw sha ki lad pathai khubor ha ka sngi Baar.
“Ka HNLC ka pynpaw ïa ka jingbitar ïa ki jingleh jong u trai ka Economic Pharmacy, uba shlan ban pyndik bad ban beh ïa ki kynthei Hynñiewtrep nongdie madan jong ngi nakhmat surok ka dukan jong u. Ka jingkam khlemraiñ jong u, ‘ba um tieng hi ruh ïano ïano’ ka pynpaw ba ka jingsngew hangamei bad ka jingbym burom. Ka jingleh jong u kam dei tang ka jinglehbeiñ tang shimet ïano ïano hynrei ka dei ka jingkren beiñ ïa ka Jaidbynriew jong ngi baroh kawei bad ka jingpynsniew dur ïa ka kyrdan jong ki briew jong ngi,” ong u kyrwoh.
“Ngi dawa ba u dei ban khang noh mardor ïa ka Economic Pharmacy bad ban kyndang ïa u trai ka dukan na ka jaka ba kyntang jong ngi. Lada u dang shlan ban sah, ka HNLC kan pynthikna ba un ym ïoh shongsuk, ym don jingshngaiñ, yn ym don jaka rieh ha ka Bri Hynñiewtrep. Ka jingsuk bad ka jingshong jahthait kin long tang ki nongwei ïa u. Kane ka dei ka jingmaham kaba khatduh. Ka jingdon jong u ka long ka jingpynbitar kaba ngim lah shuh ban shah. Lada u kyntait ban mih, ki paidbah Hynñiewtrep kin thom da ka bor khlem sangeh,” la bynrap u kyrwoh.
“Kane kam dei kaba shu jia ryngkhat. Ka dei kaba la thmu ba ladep ïasuhbuit lypa, ka jingpyndonkam bakla bad jingpynjah burom da ki briew kiba nabar kiba wan rung tuh sha ka ri jong ngi, ki lute ïa ki marpoh khyndew jong ngi, bad nangta ki nud ban ber bih ha ki trai muluk kiba kwah ban pynneh ïa ka jingrhah spah jong ki,” la kynnoh u General Secretary ka HNLC.
Haba kynthoh ïa ka Sorkar u Bah Nongtraw u la ong, ong, “shano kata kaba ki khot ka Sorkar? Ym don jaka. Jarjar. Wat ka ishu kaba la ap slem bha ban pynkynriah ïa ka Themmetor ka dang ïai bteng khlem kut, ka pynpaw ïa ka jingbymlah bad jinglong arsap jong ka Jylla. Ka jingpynbeit kaba la pynslem kam dei satia ka jingpynbeit. Hynrei da kajuh ka sur, ki tur ban kyndang ïa ki nongdie madan Hynniewtrep jong ngi na ki surok la ki dei ki shynrang bad kynthei kiba im sngi ban kamai jakpoh manla ka sngi.”
“Na ka por sha ka por, ka Sorkar ka la pynpaw ba ka ju ieng ban ïada ïa kine ki nongwei bad ïa kiba ai jingmyntoi, hynrei ym ïa ki trai muluk. Ka jingsngap jar kam dei ba kam pynpaw ba kam don jingïashah liang, ka dei ka jingshet kylla,” la kynnoh u Bah Nongtraw.
Haba maham ïa ki bar jylla, ka HNLC ka la ong, “sngap bha, ki bar jylla: Phi long kiba laitluid ban pynïaid ïa ka khaii ka pateng ha ka jaka jong ngi….ngim don jingïa kajia eiei bad kano kano ka kam khaii ba leh hok. Hynrei ha ka sngi ba pynibor, byrngem bad pynlehraiñ ïa ki trai muluk to tip tang ïa kane kawei…ngin wiang da ka ding ïa phi. Ngin pynkylla pum pum ïa ka jingaram jong phi bad ngin pynkylla dpei ïa ka jingdon jingem jong phi. Kane ka dei ka Hynniewtrep. Ngim ju pyndem hakhmat kiba nabar. Phi tam ïa u laiñ, ngin hap ban ai jubab da kaba tyngeh. Kane ka dei tang ka jingmaham ïa phi.”
