Shillong, Naitung, 02: Ki Pulit ka East Jaintia Hills ha ka 2 tarik Naitung, 2025 ki la ïoh ban kurup ïa u drok heroin uba khia 160.36-gram bad kaen ka jingïoh kurup ka long hadien ba ki pulit ki la pynlong ïa ka jingtalasi kali ha Umtyra bad ha ka por 11.00 baje mynstep katba ki dang pynieng ïa kawei ka kali kaba don ïa u number ML-04B 9703 na ka bynta ban pynlong ïa ka jingtalasi.
Ha ka jingtalasi ki Pulit ki la ïoh kurup 14 tylli ki synduk thep sabon ba la thep ïa u powdar ba la suba ba dei u drok Heroin. Hadien ba la leh tes, la shem ba u dei u drok Heroin uba don ka jingkhia kaba 160.36 gram.
Ha kaba ïadei bad kane ka jingjia, ki Pulit ki la kem noh ïa uwei u briew uba la tip kyrteng kum u Kabir Uddin Mazumder bad la pynngat ïa u hapoh ki kyndon jong ka NDPS Act bad ka jingtohkit mynta ka la ïaid shakhmat ban lap shuh shuh ïa kiba donkti.
