Shillong, Naitung 03: U Myntri ka tnat Bording u AT Mondal u la ong ba ka Kulsi Multipurpose Project kaba ha Assam yn pyntreikam hadien ba la ïoh ka jingshaniah bad ka jingmynjur na baroh ki nongshong shnong.
Haba kren sha ki lad pathai khubor u Mondal u la ong ba kane ka project la dep ban ïasyllok hapdeng u Myntri Rangbah ka jylla Meghalaya bad Assam kaba long kum ka ‘friendship project’.
U Mondal u la ïathuh ba u Myntri Rangbah ka jylla Meghalaya u la pynthikna ba dei ban ïoh shwa ka jingshaniah na baroh ki nongshong shnong bad ki paidbah ha shwa ban pynïaid shakhmat ïa kane ka project.
U Myntri u la kubur ruh ba bunsien ki power project ha ka jylla ki mad ïa ki jingeh na ka daw ka jinglong jong ka thaiñ, ka jingïoh ka jaka, bad kiwei ki kam da kaba bynrap ruh, “Kumta kawei kaba u Myntri Rangbah u la ong ka dei ban ïoh ka jingshaniah jong baroh ki nongshong shnong khamtam lada don kino kino ki jingpyrshah. Lada ka sorkar kan lah ban pynbeit ïa kine ki jingsngewkhia bad ban pynngeit ïa ki briew, kin sa lah ban mynjur.”
Ha kawei ka liang u Mondal u la ong ba kane ka project ka dang dei ha ka kyrdan jong ka jingsdang, kumta kam shym la don kano kano ka rai kaba la shim ha kaba ïadei bad ka jingpyntreikam ïa kane ka projek.