Shillong, Naitung, 03: Ka Sorkar Jylla kan sa pyntreikam biang ïa ka Memorandum of Understanding (MoU) ba la ïasoi bad ka M/s Athena Private Limited na ka bynta ban tei ïa ka shlem pynmih bording jong ka Kynshi Hydro Power Project stage-I.
U Myntri ka tnat Bording ka Sorkar Jylla u Abu Taher Mondal ha ka sngi Palei u la pyntip ba ïa ka jingtyrwa ban pyntreikam biang ïa ka MoU yn sa rah shen ha ka jingïalang Kynhun Myntri.
Ïa kane ka projek, ha kaba sdang, la aiti sha ka Athena Pvt Ltd lyngba ka Run-of-the-River (RoR) Basis. Hynrei hadien ka kompeni ka la tyrwa ïa ka Hybrid Model ban pynrung ïa ka Pump Storage Project (PSP) Technology. Namar ka jingbym don jong ki kyndon ka PSP ha ka MoU bad ka Power Policy jong ka Jylla, ka Kynhun Myntri ka la rai ban pyndam noh ïa ka MoU kaba rim.
Da kaba pynrung ïa ka Power Policy ba thymmai ha ka Pump Storage Project (PSP) Technology, ka Athena Pvt Ltd ka la jied ban phai dien biang sha ka jingtyrwa kaba rim jong ka RoR khlem ka PSP, da kaba kdew ïa ka jinglah ban leh da ka buit thymmai.
“Da ka jingwan jong ka teknoloji kaba thymmai, ki (Athena) la ong ba ka RoR ruh ka long kaba lah ban leh. Kumta ki kwah da kajuh ka jingtyrwa kaba rim jong ka RoR khlem ka PSP. Kumba ngi la pyndam ha ka Kynhun Myntri, ngi hap ban rah sha ka Kynhun Myntri ban pynneh biang ïa ka MoU kaba rim. Kane ka dei ka jinglong mynta”, la ong u Mondal.
U Mondal u la ïathuh ba ka Sorkar Jylla kan ïoh bording ei 12% ynda la pyntreikam ïa kane ka projek bad 1% la mang na ka bynta ki kam pynroi ha ka thaiñ.
U Myntri u la ïakynduh ruh ïa ka kynhun jong ka Joint Committee of Local People on Kynshi Hydro Power Project (JCLPKHPP), kiba pynpaw ka jingkyrmen halor ka jingpynim ïa kane ka projek.
U la kular sha ki nongïalam ka Joint Committee ba kan sa don ka jingïalang hapdeng ki nongmihkhmat na ka kompeni, ka Sorkar bad ki kynhun bapher bapher.
“Nga don bha ka jingkyrmen namarba ngi donkam ban pynmih bording kham bun. Khlem ka jingpynmih ngin ym lah ban kyntiew ka jingdon ka bording. Ki (Joint Committee) wan ïakynduh ïa nga bad nga sngewkmen shikatdei eh. Nga la ïoh ban ïakren ruh bad ki la slem bha. Mynta ka sngi ki la wanrah ruh ïa ki mat jingdawa bad kaei kaba ngi la ïakren ka biang lut nadong shadong bad kam don satia kano kano ka jingeh,” u la ong.
“Nga la bthah ïa ki briew na ka tnad ba kin ïakynduh ïa ki paidbah ym tang na ka bynta ban ïasoi ïa ka MoU hynrei ki dei ban pyntreikam ïa ka projek ruh,” u la bynrap shuh shuh.
