Shillong, Naitung, 04: Ka National People’s Party (NPP) ka la pynkhreh na ka bynta ka elekshon ka ban sa long ha Garo Hills Autonomous District Council (GHADC), ha kaba u nongïalam ka NPP u Rakkam A. Sangma uba long ruh u Myntri Sorkar u la pynpaw ïa ka jingsngew skhem ban dang jop bun paid.
Ha ka jingïakren bad ki lad pathai khubor ha ka sngi Thohdieng, u Sangma u la kyntait ba kan don ka jingïatreilang bad kiwei kiwei ki seng saiñpyrthei da kaba ong, “”klet noh ïa kiba don kajuh ka jingmut, klet noh ïa ka jingwan sha ka jingïatylli. Ka NPP kan trei shitom bha ban ïoh ïa ka jingbun paid kaba pura ha GHADC.”
“Ha ka saiñpyrthei ka don beit la ka jong ka jingkylla bad ngi khmihlynti ïa ka jingmih kaba pher bad ka jingpynkhreh kaba pher. Kam long kaba suk ïa uno uno u briew. Ha,oid, ka NPP kum ka party, ngi dang pynkhreh bad ngin sa trei shitom. Ngim shim kabu eiei,” u la ong haba jubab ïa ka jingkylli halor ka jingpynkhreh jong ka Liang Pyrshah na ka bynta ka elekshon.
U Sangma u la ong ba ka party kan pynleit jingmut ha kaba pynpaw ïa ki jingjop jong ka ha ki bynta bapher bapher. U la kdew ba ka Sorkar Jylla hapoh ka jingialam jong u Myntri Rangbah u Conrad K Sangma ka la lah ban wanrah ia ka jingkylla ha ka liang ka surok, ka koit ka khiah, ka pule puthi, ka jingïalehkai sports, ka rep ka riang bad katto katne.
“Hynrei ka jaka ban pynbha ka don beit bad ngi la pynshisha ha ki paidbah ka jylla bad ki paidbah ka Garo Hills. Peit ïa ki surok kiba itynnad, ki madan ïalehkai, ki kolej kiba bun, bad ki ïing skul. Ngi la buh ïa baroh ki stream ha baroh ki skul Sorkar. Ngi la pynbha bad shna ïa ki iing kolej kiba bha. Ai ba ki paidbah kin bishar bad thew sawar ïa ka jingtreikam jong kane ka Sorkar,” u la ong haba kyntu ïa ki nongthep vote ban bishar bniah ïa ka jingtreikam jong ka Sorkar.
Haba kylli, u Sangma u la pynpaw ba palat spah ngut ki kyrtong ki la pynpaw ïa ka jingkwah ban ïakhun na ka NPP, ha kaba bun ki kyrtong ki ïakhun ban ïoh tiket ha ki katto katne ki Constituency. U la kyntait ruh ïa ki jingkynnoh ba ka party ka lah ban rem ha ka elekshon GHADC, da kaba kdew ïa ka jingtrei shitom bad ka jingaiti lut jong ka party.
Haba kylli hato ka elekshon GHADC kan long kum ka Semi-final na ka bynta ka elekshon 2028, u Sangma u la kdew ba ka jingmih na ka elekshon ka lah ban ïapher bha, da kaba ai nuksa ïa ka elekshon Lok Sabha ba dang shen bad ka elekshon Shiteng Samoi ha Gambegre.
“Peit dang shen ka la don ka jingjop kaba la tam da ka Congress ha Garo Hills ha ka elekshon MP hynrei tang hapoh shibnai ngi la don ïa ka Bye Election ha Gambegre hynrei ka jingmih ka la kylla noh. Kumta, na kawei ka elekshon sha kawei pat ka elekshon ka ju kylla,” u la ong haba pynskhem ba ka jingjop ha ka elekshon GHADC kan long ka dak kaba bha na ka bynta ka jingtreikam jong ka party.
