Shillong, Naitung, 09: Ka long ka khubor kaba ai mynsiem ïa kiwei ki samla pule ka jylla haba u samla Yoonis Lyngdoh u khun jong u Bah Pher Dkhar (bam kwai ha dwar u Blei) bad Kong Lir Lyngdoh na ka shnong Rangad, East Jaiñtia Hills District ula ïoh haduh 99.41% bad long ruh u State Topper ha Meghalaya ha ka jingïakhun ïa ka Exam NEET jong u snem 2025.
Da ka jingsngew sarong halor kane, ka Dorbar Shnong Rangad ryngkat ka Kur Lyngdoh Rangad ki la pynkup burom bad ai mynsiem ïa une u samla ha ka jingïalang kaba la long ha ka 8 tarik, Naitung, 2025.
Ha kane ka sngi la donlang u Myntri ka Sorkar Jylla u Bah Kyrmen Shylla uba long ruh u MLA jong ka Khliehriat Constituency kum u kongsan, u Deputy Chairman jong ka Jaiñtia Hills Autonomous District Council u Bah Wailad Dameshwa Siangshai kum u symbud kongsan, u SDSEO jong ka East Jaiñtia Hills District u Bah Onickson Sumer, u Principal jong ka Jaiñtia Eastern College u Dr. Phervision Nongtdu, u MDC barim Bah Joinriwell Pyrtuh, u Waheh shnong u Bah Damon Lamo bad kiwei kiwei.
