Shillong, Naitung, 11: Ki nongïalam shnong bad ki nongshong shnong jong ka shnong Killing, Ri Bhoi District kaba don ha khappud jong ka jylla Meghalaya
bad ka jylla Assam ki la khie bitar lep ïa ka jingleh donbor jong ki briew na ka jylla Assam kiba la rung hapoh u pud u sam jong ka shnong khlem ka jingpyntip ïa ki bor synshar ka Ribhoi District bad ïa ka Dorbar Shnong Killing.
Katkum ka jingïathuh jong ki nongïalam shnong, kine ki briew na ka Jylla Assam ki la wan rung jubor hapoh ka shnong Killing ha ka sngi Thohdieng ban leit sorjamin sha ki karkhana tyllaitmaw da kaba kam ba ki dei ki briew na ka ka sorkar Assam bad kiba mihkhmat ïa ka Kashari jong ka jylla Assam bad kam ruh ba ki la ïohbor ban khynra ïa kine ki jaka.
Ki nongïalam shnong ki la ïathuh ba ki la ïoh jingtip ba la lamkhmat ïa ki briew na ka jylla Assam da u Jitul Deka, hynrei haba ki nongïalam shnong bad ki nonglum Khubor ka Ri Bhoi District ki la pyrshang ban kylli na u halor kane ka jingkhynra u la kyntait ban ai jubab hynrei u la phet krad pynban nakhmat ki nonglum khubor bad mih syndon napoh u pud u sam jong ka shnong.
Ki jaka ba ki briew na ka jylla Assam ki la leit ban khynra ki kynthup ïa ki jaka kiba hap ha u pud u sam ka University of Science and Technology, Meghalaya bad katto katne tylli ki karkhana tylliat maw.
