Shillong, Naitung, 12: Kum shi bynta ban ai mynsiem bad pynshlur shuh shuh ïa ki samla pule ha ka liang ka pule puthi bad ha kino kino ki sap ki phong ba ki don, ka Seng Samla Mawlai Pyllun ha ka sngi Saitjaiñ, ka la samla ïa ka ka Academic and Exceptional Talents Personality Award 2025, ha ka jingïalang kaba la long ha Conference Hall jong ka Polytechnic Mawlai.
Ka Seng Samla ka la pynkupburom kumba 43 ngut ki samla pule kiba pas bha ha ki jingpule jong ki ha ka ekamin Secondary School Leaving Certificate (SSLC) bad ha ka Higher Secondary School Leaving Certificate (HSSLC) bad nalor kine, ka seng samla ka la pynkup ruh ïa ki 22 ngut pat ki samla shynrang bad kynthei kiba long ki nongshong shnong jong ka shnong Mawlai kiba la jop ha ki jingïalehkai bapher bapher bad kiwei pat ki sap ki phong ba ki don.
Ha kane kajuh ka sngi ka Seng Samla ka la pynkupburom ïa kawei ka longkmie kaba bsa ïa ki khun ki kti bad ban pyndap ïa ka ing ka sem da kaba im sngi ban tam ïa ki mar jot ha Marten la kumba 40 snem eiei mynta ïa kaba la tip kyrteng kum ka Kong Bibisha Kharnaior kaba shong basah ha ka shnong Mawiong Umjapung.
Ïa ki khusnam ha kane ka sngi la sam da u Additional Deputy Commissioner jong ka South West Khasi Hills District u Bah Labiang Tariang uba la long teng u President barim jong ka seng samla mawlai pyllun bad uba la long kum u kongsan ha kane ka sngi, ryngkat u President jong ka Mawlai Town Dorbar u Bah Herlambok War uba la long kum u symbud kongsan bad kiwei kiwei.
