Shillong, Naitung, 18: U Sub-Divisional Magistrate ka Sohra Civil Sub-Division Bah M.A Challam ha ka sngi Thohdieng u la pynjari da ka Section 163 BNSS ban mana ïa ki trok ba kim dei ban kit palat pud ïa u maw bad u shyiap na kaba la ai jingbit.
Katkum ka hukum SDM u la mana, ba ka jingkit ïa ki maw bad u shyiap kam dei ban long palat pud na kaba la ai jingbit. La mana ban kit ïa ki maw bad u shyiap da ki trok hapdeng ka por 5:00 baje mynstep bad 8:00 mynmiet lyngba ka surok Shillong-Sohra. Kano kano ka jingpynkheiñ ne ka jingbymkohnguh ïa kine ki hukum kin ngat ha ka jingshah pynshitom katkum ki kyndon aiñ.
Kane ka jingpynjari kyndon, ka long hadiem ba la ïoh ujor ba ki don ki trok kit maw 16 shaka kiba ïaid lyngba ka surok Shella-Sohra kiba kit palat pud. Ka ophis u SDO ka la ïoh ujor ruh na kiba bun ki Sirdar, Sordar bad Rangbah Shnong halor ka jingïaid jong ki trok ba kit palat pud kaba buh jingma ïa ka leit ka wan jong ki paidbah.
“Ka jingïaid jong kine ki trok ba kit palat pud ka buh jingma ïa ki kali bad ïa ka leit ka wan jong ki paidbah ba shilyntere lynti bad kaba wanrah ruh ïa ka jingdheng kali khamtam ha ki khongdong surok, na ka daw ka jingkylla khongpong jong ki trok ha kine ki bynta,” la ong u Bah Challam.
“Ka jingïaid lynti jong kine ki trok ba kit palat pud ka la pynjulor bad pynpei thliew ïa ki surok ba dang shu dep shna thymmai bad lap ruh ïa ka dak orpait jong ka surok,” u la bynrap.
Namar ka jingkyrkieh jong ka kam, kane ka hukum kan treikam noh mardor tang haduh ban da pynbna da kumwei pat.
