Shillong, Naitung, 19: Ka phlim Khasi ba la ai kyrteng ‘Lanot,” ba la pynmih da ka Star Films Production hapoh ka jingïalam jong u Bah Moonstar Nongdhar, la pyni paidbah ha Bijou Cinema.
Ïa kane ka phlim la pynshong nongrim halor ka jingim jong ki longïing ki baduk bad kiba ju shaniah tang ha ka kam tih bad khaii dewïong – kaba dei tang kawei na ki lad kamai ban pyndap ïa ki jingdonkam jong ki. Hynrei hadien u snem 2014, ba la khang ïa ki lut ïa ki Coke Factory bad ka jingtih dewiong thliew khnai ha jylla Meghalaya, ka la pynlong ïa kiba bun ki longiing ha ka thain rilum Jaiñtia ban ym ïoh kamai shuh.
Ha ka phlim, la buddien bniah ïa ka jingim jong ka Kong Rida, ka kmie kaba la duh noh ïa u lok bad hadien kata, ka la hap ban ïaleh marwei ban ri bad sumar ïa la ki khun ha ka jinglong riewkynthei marwei. Ka jingbym ïoh kamai shuh na ka jingtih dewiong, ka la pynlong ïa ka jingim jong ka Kong Rida bad ïa ka longïing ban mad ïa ki jingeh.
Ka phlim Lanot ka ai mynsiem bad ka pyni ruh shaphang ka jingduk tasam, ka jingeh ban ïoh jingïarap na ki Bank, bad ka jingshah lehbeiñ ha ki bor Sorkar.
Ki nongwan sakhi ïa ka phlim, ki pynpaw da ka jingsngewkhia, “ka long kum ka kitab jingim jong ngi hi, ka jingim jong ki paidbah basah ha khlaw, ki baduk, kiba la duh ïa ki lad kamai, ka pynlong ïa ngi ban ïohi shai kdar ïa ka jingshisha ha ka imlang sahlang.”
U Bah Moonstar Nongdhar, u Producer, u Director bad u nongthoh ïa ka khana jong ka phlim “Rngiew” bad “Ka Rynsan Jingim”, bad ha ka phlim Lanot u la pyni shuh shuh ïa ka sap thoh ïa ka khana jong ka phlim. Ka thoh, ka drama bad ka jingshisha la pynïasnoh ha ka rukom kaba pynkhih mynsiem bad ka pynlong ïa kane ka phlim kaba itynnat.
U Bah Moonstar u kyntu ruh ïa ki paidbah ba kin ai ka jingkyrshan na ka bynta kane ka phlim kaba pyni sha ka pyrthei ïa ka sur jong ki briew kiba ïa kynduh jingeh ha ka imlang sahlang.
Mynba ka kam tih dewïong ka dang ïaid beit, kiba bun longïing ki dang lah ban pynbiang ïa ki jingdonkam ha la iing. Hynrei hadien ba la khang syndon ïa ka jingtih dewiong, ki briew ki la shah ktah tyngeh, kim don shuh ki lad kamai. Ki la im hapdeng ki jingsngew khuslai, ki jingkulmar bad ki jingeh ban ïoh bam, ban pynheh pynsan ïa ki khun bad pynnang pynstad ïa ki.
Kum ka nuksa, ha kawei ka longïing ba la pyni ha ka phlim Lanot, u kpa ka iing u panram manla ka por bad ha kawei ka sngi u la leh ka kam kaba bakla kaba la wanrah ïa ka jingpra syndon jong ka longïing. Hynrei, ynda u khun u la heh, u la pyrshang ban wad biang ïa la ka kmie bad kpa. Ka lynti jong u ka long kaba dap da ki jingeh, hynrei u la ïai trei shitom bad ka la poi ruh ha ka bynta ba u la jop ïa ki jingeh baroh.
Kane ka long ka khana kaba dap da ka jingsngewsih, hynrei ka pyni ruh ïa ka jingkhlaiñ jong ka mynsiem briew bad ka jingïaishah ha ka jingim.
