Shillong, Naitung, 22: Ka Iingbishar Meghalaya High Court ka la bthah ïa ka Sorkar Jylla ban thaw ïa ki Animal Birth Control (ABC) Committee na ka bynta ka South Garo Hills bad ka West Jaiñtia Hills.
Ka jingbthah jong ka Iingbishar ka la wan hadien ba la don ka jingujor ïa ka Public Interest Litigation (PIL) kaba ïadei bad ka jingkhanglad ïa ka jingjyllei ki ksew surok ha ka jylla.
Ïa ka PIL la ujor da u Kaustav Paul, ka Iingbishar ka la peitngor ïa ka sienjam jong ka Sorkar ban khanglad ïa ka jingdon jong ki ksew surok.
Ka Sorkar Jylla ka la pyntip sha ka Iingbishar ba la thaw ïa ki ABC Committee na ka bynta kiba bun ki District, hynrei ar tylli ki District, kata, ka South Garo Hills bad ka West Jaiñtia Hills kim pat don ïa kine ki Committee.
Ka Iingbishar ka la bthah ruh ïa ka Sorkar Jylla ban ai jingtip shuh shuh ïa ki kam ba la leh, kynthup ka jingthaw ïa ki Committee na ka bynta ki ar tylli ki district, ha ka 6 tarik, Nailar, 2025.
“Ngi bthah ban pynrung ïa kane ka PIL sa shisien ha ka 6 tarik, Nailar, 2025 ban ïoh ïa ka kaiphod ba pyni ïa ki kam ba la leh, kynthup ïa ka jingthaw ïa ki Committee na ka bynta ki ar tylli ki district ba la kdew,” la ong ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Baar (22 tarik, Naitung).
Ka jingthmu ban shimkhia katkum ka aiñ Prevention of Cruelty to Animals Act, 1960 bad ka Animal Birth Control (Dogs) Rules, 2001 ka long ban ïada bad khanglad ïa ka jingma kaba mih na ki ksew surok da kaba kem noh ïa ki, ban sumar, ai tika, pynkha khun bad pynsah ïa ki ha ki jaka ri kyrpang.
La khmihlynti ba ki ABC Committee kin leh ïa ka kamram ba la bynshet na ka bynta ban peit ïa ka jingkharoi jong ki ksew surok bad ban ïada ïa ka jinglehbeiñ leh khoh ïa ki mrad.
