Shillong, Naitung, 25: Hadien ka jingkyndang jong ka Sorkar Assam ïa ki mynder kiba buhai shnong beaiñ ha Dhubri bad ha Goalpara, ki nongïalam jong ka Federation of Khasi Jaiñtia and Garo People, Mawshynrut Circle, ha ka sngi Thohdieng ki la leit ban ïakynduh ïa u ophisar ba dei peit ïa ka Anti infiltration check gate kaba don hapoh Athiabari West Khasi Hills Distirct kaba dei ruh ka khyrdop rung bad mih sha Assam bad Meghalaya.
U President jong ka Seng u Samla Evening Nongsiang ha ka jingïakren bad ki lad pathai khubor u la ong kum ka Seng kam hun khlem da tip tikna ïa ka daw lane ka jingthmu jong ki briew nabar haba ki wan rung sha Meghalaya khamtam hadien ba ka Sorkar Assam ka la pyntreikam ïa ka aiñ ban kyndang ïa kiba buhai shnong beaiñ bad u la ong ruh ba ka jingsheptieng ka long ïohba kito ki briew kiba shah beh na ka jylla Assam kim wan rung tuh bad buhai shnong beaiñ sa ha ka Jylla Meghalaya.
