Shillong, Naitung, 26: Ka National People’s Party (NPP) Pynthorumkhrah Block ka la pynthymmai ïa ki nongkitkam ha ka jingïalang kaba la long dang shen ha ka 24 tarik mynta u bnai ha Iing Dorbar Hall, Golflink.
Ha kane ka jingïalang pynthymmai, la pynbna ïa u Bah Arnold Khongwir kum u President ba thymmai, katba u Bah Rocky Hek u la sangeh noh ban shimti ïa kane ka kyrdan. Ïa ka kyrdan Working President la shimti da u Bah Kordor Lyngdoh katba u Bah Franky Hek u la shimti kum u General Secretary bad u Bah Johnwell Momin kum u Treasurer.
U Bah Rocky Hek, uba long ruh u National Secretary jong ka NPP, ha ka jingkren jong u, u la ai ka jingïaroh ïa ka Sorkar kaba ïalam da u Conrad K Sangma kum u Myntri Rangbah ha kaba u la ong ba ka sorkar MDA ka la lah ban wanrah bun ki jingkylla kiba paw ha ka jylla Meghalaya.
U la ong, “ym don Sorkar shuh kum kane” haba pynpaw ïa ki jingshah tynjuh bad ki jingtrei shitom jong ka NPP ha ka kam synshar paidbah.
U Bah Hek u la kdew ba ka Sorkar hapoh ka jingïalam jong ka NPP ka la shimkhia ha ki liang bapher bapher kum ka roi ka par, ka pule puthi, ka koit ka khiah, ki surok bad ki lad pathai khubor. U la kyntu ïa ki paidbah ba kin ïatreilang bad ai ka jingkyrshan ban pynkhlaiñ shuh shuh ïa ka NPP.
Ka jingïalang ka la pyni ïa ka jingïashim bynta jong ki paidbah bad ki nongkyrshan jong ka party, kiba la wan ban sngap bad ai mynsiem ïa ki nongïalam ha ka jingjied ïa ki nongkitkam ba thymmai. Kane ka pynpaw ba ka NPP ka dang don ka jingïatylli bad ka jingïatrei lang ryngkat ka jingkyrmen na ki paidbah ban bteng ïa ka trei kam na ka bynta ka bha ka miat jong ka jylla.
