Shillong, Naitung, 26: Ka Deen Dayal Upadhay Grameen Kaushalya Yojana (DDUGKY) kaba dei ka shlem ai jinghikai halor ki sap ki phong ba plie lad ïa ka seng kam seng jam ka la pynkupburom palat 30 ngut ki samla jong ka thaiñ Mawryngkneng ha ka prokram kaba la long ha Conference Hall jong ka Mawryngkneng C&RD Block.
Ïa ka prokram ba la pynïaid da ka Ministry of Rural Development jong ka Sorkar India kaba la long ha ka 22 tarik mynta u bnai la sakhi lang da u MLA jong ka Mawryngkneng Constituency u Bah Heavingstone Kharpran, u Block Development Officer (BDO) ka Mawryngkneng C&RD Block u Bah Anthony Lyngdoh, u Chief Operating Officer (COO) u Bah Lambok Dhar bad kiwei kiwei ki heh ophisar, ki nongtrei bad ki nongkitkam jong ka DDU-GKY.
U Bah Heavingstone haba kren ha kane ka sngi u la ai khublei halor ka jinglah ban pynurlong ïa ka jingthmu jong ka Sorkar Kmie kaba la long ka jingkyrkhur ïa ki samla jong ki shnong kiba hap hapoh ka Mawryngkneng Constituency kiba la ïoh ki lad ïoh kam lyngba kane ka program.
U la pynpaw ïa ka jingkmen ba wat hapdeng kane ka pyrthei kaba hiran ha ka ïohkam ïohjam pynban da ka jingplie lynti ka DDU-GKY, ka la plie ïa ka lad ïohkam ïohjam ïa ki samla jong ka thaiñ.
La ïathuh ba haduh mynta na ka Mawryngkneng C&RD ki samla kiba la shah hikai pyntbit ki long kumba 363 ngut bad kiba la ïohkam lyngba kane ka jingshah hikai pyntbit ki long 200 ngut bad hadien ki jingshah hikai pyntbit yn sa pynïoh kam shuh shuh ïa ki samla ka thaiñ shabar ka jylla bad shabar ka Ri India.
