Shillong, Naitung, 31: U Nongïalam ka Liang Pyrshah u Dr. Mukul Sangma ha ka sngi Palei , u la ong mynba u dang long Myntri Rangbah ka jylla um shym la ai ka jingkular ban pyntreikam ïa ka Inner Line Permit (ILP) khlem da ïoh ïa ka jingmynjur na ka Sorkar Pdeng bad halor kata, u la wanrah ïa ka Meghalaya Residents, Safety and Security Act (MRSSA) kum ka lad ban khanglad ïa ka jingwan jong ki briew kiba nabar sha ka jylla.
Katkum ka jingong jong u, ka aiñ MRSSA ka aibor ïa ki dorbar shnong ban pyrkhing ïa ka jingrung bad ka jingsah jong ki briew kiba nabar.
“Namarkata haba nga tip ba lada ka Sorkar India ka shim por ban mynjur ïa ka jingdawa ILP, ngam lah ban kular na ka bynta ka Sorkar India bad dei na kata ka daw ba ngam shym la kular satia ïa ka ILP, hato nga la kular ïa ka ILP,” la ong u Sangma ha ka jingïakren bad ki lad pathai khubor.
U Sangma u la kynthoh ïa ka Sorkar ba mynta ba la kynnoh ba ka la ïalam bakla ïa ka Iingdorbar Thawaiñ bad ïa ki paidbah ka Meghalaya. U la kdew ba ka Sorkar ka la kular ban pyntreikam ïa ka ILP khlem da pynkohnguh ïa ka sorkar India, kaba long kum ka jingthok pyllein pylleiñ ïa ki paidbah.
“Hynrei ngi la mynjur ban pdiang da kawei ka sur ïa ka rai ha ka Iingdorbar Thawaiñ ha ka por ba ka Sorkar kaba myntaka kular ba ka lah ban leh ïa kata, ki kular ba kin lah ban leh ïa kata, kumta ngi la ai ka jingmynjur ban thep vote hynrei ngam shym la kular ha ka por jong nga namarba nga tip ba ngam lah ban pynkohnguh ïa ka Sorkar India, hynrei ha kata ka por nga la leh ïa ka jingwad bniah jong nga, nga la leh ïa ka kamram jong nga namarba nga tip ba ngam lah ban pynngeit ïa ka Sorkar India kumta balei ngan pynbiej ïa ki paidbah,” u la pynpaw.
U Sangma u la banjur ba ka MRSSA ka dei ka lad kaba lah ban long kum ka lad treikam jong ka ILP.
Haba kylli, u Sangma u la ong ba ïa kane ka aiñ la shna khnang ban weng ïa ki jingeh na ka jingwan tuid jong ki briew kiba nabar bad ka jingpyntreikam kaba paka ïa ka ka lah ban ïarap ban pynbeit ïa ka jingrung bad ka jingwan sah jong ki briew kiba nabar.
U Sangma, uba dei u nongsaiñdur jong kane ka aiñ, u la pynkynmaw ïa ki jingeh ha kaba la pynwandur ïa ka aiñ katba dang pynthikna ba kan sah hapoh ka bor jong ka Iingdorbar Thawaiñ jong ka jylla.
U la ban jur ba ka MRSSA ka aibor ïa ki Dorbar Shnong, kum ki Rangbah Shnong bad ki Nokma ban tem ïa ka jingrung jingmih jong ki briew kiba nabar.
U la ai nuksa ïa ka shnong Nongrim Hills, ha kaba u Rangbah Shnong u don ka bor ban rai mano ba lah ban sah bad mano ba bym lah ban sah bad u la ong ba ïa kajuh ka rukom treikam lah ban pyntreikam sha kiwei pat ki shnong.
Shuh shuh u Sangma u la kynthoh ïa ka Sorkar MDA namarba kam shym la pyntreikam hok ïa ki kyndon ban buh ïa ki Facilitation Centre kaba lam sha ka jingshah tuklar ha ka ïingbishar
