Shillong, Nailur, 01: U Symbud Myntri Rangbah ka Jylla uba khmih ïa ka tnat Kam Pohïing u Bah Prestone Tynsong ha ka sngi Thohdieng u la ong ba ka la dei ka por ba ka Sorkar Pdeng kan kren da kaba shai halor ka jingbishar la kan ai jingmynjur neem ïa ki rai ba la mynjur da ka Ïingdorbar Thawaiñ ka Jylla ban pyntreikam ïa ka Inner Line Permit (ILP) bad ban pynrung ïa ka ktien Khasi bad Garo ha ka Khyrnit Baphra jong ka riti synshar ka ri India.
Ha ka jingïakren bad ki lad pathai khubor, u Bah Tynsong u la kyntait ïa ki jingkynnoh jong u Nongïalam ka Liang Pyrshah u Dr. Mukul Sangma halor kane ka mat bad ong ba ka Sorkar Jylla ka la ïatreilang bha bad ka Sorkar Pdeng halor ka mat jingdawa ILP, ha kaba u Myntri Rangbah ka jylla u Conrad K Sangma u ju ïakynduh manla ka por ïa u Myntri Rangbahduh ka ri u Narendra Modi bad ïa u Myntri ka tnat Kam Pohïing jong ka Sorkar Pdeng u Amit Shah ban ïakren halor ka jingdawa ban ai jingmynjur ïa kitei ki ar tylli ki mat.
Ka Sorkar ka la buddien ruh na ka Ministry of Home Affairs (MHA) ban ai jingmynjur ïa ka rai ba la mynjur da ka Ingdorbar Thawaiñ ka Jylla.
U Bah Tynsong u la pynpaw ba ka Sorkar Jylla ka la leit pynsgew sha ka Sorkar Pdeng ym duna ïa ka 10-15 sien ha ka shisnem bad ka Sorkar Pdeng ka la pynthikna ba ïa ka ishu ILP ka dang bishar.
“Haba ngi ïakynduh ïa ki kumba nga la ong ïa phi nga tharai ym duna ïa ka 10-15 sien ha ka shisnem bad haduh mynta ka sngi haba ngi ïakynduh ïa ki (Sorkar Pdeng) ki la ong ba ngi dang bishar bniah ïa ki mat kynthup ïa ka ILP bad ka jingpynrung ïa ka ktien Khasi bad Garo. Hynrei ngi dang ïai pynkynmaw ïa ki bad ngi ïai buddien ïa ki,” u la ong.
“Na ka liang jong ka sorkar kam dei ba ngi thok, kam dei ba ngi shu thiah thai hynrei ngi la buddien bha ïa kane ka jingdawa,”ong u Bah Tynsong haba pynpaw ïa ka jingkyrmen ba ka Sorkar Pdeng kan ai ïa ka jubab kaba shai halor kane ka mat, la ka long kaba bha ne kaba sniew.
U Bah Tynsong u la pynpaw ruh ba ka Sorkar kaba mynta ka la kut jingmut ban buddien ïa ka mat jingdawa ILP da kaba tyngeh, kaba long markhongpong ïa ka jingkam jong u Dr. Mukul Sangma.
Halor ka jingkylli, u Bah Tynsong u la pynshai ba ym don shuh da kiwei ki ki lad ki lynti kiba ka sorkar ka dang pyrkhat, bad ïa ka mat ILP la buddien la ka jong na ka Sixth Schedule.
“Ym don kano kano ka lad ba la shna da ka Sorkar India, ym ju don satia kumta. Ngim ju don ïa kata ka jait lad namar ba ka Sixth Schedule ka dei ka mat kaba pher bak-ly-bak bad nangta ka ILP ka dei ka mat kaba pher bak-ly-bak,” u la pynpaw.
