Shillong, Nailar, 01: U State President jong ka National People’s Party (NPP) u Bah Prestone Tynsong uba long ruhu Symbud Myntri Rangbah ka Jylla u la kyntait war ïa ka jingkynnnoh ba ka party jong u ka khwai lut ïa ki MLA na kiwei pat ki party, hadien ka jingpynïasoh ba dang shen jong u MLA ka Congress u Bah Ronnie V. Lyngdoh sha ka NPP.
Ha ka jingïakren bad ki lad pathai khubor ha ka sngi Thohdieng, u Bah Tynsong u la ong ba ka rai jong ki MLA ban pynïasoh bad ka NPP ka dei na ki jingtreikam ban kyntiew ïa ka roi ka par da ka party, ym da ka jingpynbor da ka pisa.
“Kam dei namar ka pisa; ka dei tang namar ka roi ka par,” u la ong bad bynrap ba ki MLA ki la ïohi ïa ka jingangnud jong ka party ha ka roi ka par bad ki shah pynbor ha ki nongthep vote jong ki ban ïasoh bad ka NPP.
U la bynrap shuh shuh da kaba ong, “Ym dei u Bah Ronnie V Lyngdoh uba la jied ban pynïasoh bad ka NPP, dei ki briew jong u kaba mut ka rai jong ki paidbah ha kaba kut. Lada ki briew jong ki kim kwah ïa u MLA jong ki ban ïasoh bad ka NPP balei kin shu leh kumta? Peit ïa ki lai ngut ki MLA na ka Congress bad nangta dang shen sa uwei pat u MLA na ka Congress u la pynïasoh bad kine ki MLA jong ka Congress hato phin pyrkhat ba kin ban ïamir jingmut shwa bad ki nongïalam jong ki bad ki briew jong ki ha Constituency. Da kaba leh kumta ka pynshisha shai bha mynta ba ki paidbah ka jylla mynta ki la jied ïa ka NPP, ki la kwah ban ïasoh bad ka NPP bad ka dei ruh namar kawei ka mat bad kata ka long ka roi ka par.”
U Bah Tynsong u la pynpaw ruh ba ka jingkhang jong ka party ka plie ïa baroh ki nongmihkhmat paidbah na kiwei kiwei ki party ban pynïasoh bad ka NPP/
“Ngi don ka kamra kaba heh bad ka jingkhang ka dang plie. Lada baroh 60 ngut ki MLA kin ïasoh bad ngi, katta ngin nang kham kmen,” la ong u Bah Tynsong haba pynpaw ïa ka jingangnud ban ïohi ba baroh 60 ngut ki MLA ka jylla kin long ki dkhot jong ka NPP.
“Kum u president ka NPP ngi pdiang sngewbha ïa baroh. Lada ngi ïoh 60 tylli ki nombar, ngin da kmen shikatdei eh. Sngewbha ïasoh bad ka NPP. Haba pynïasoh, dei ban leh ïa kaba donkam na ka bynta ka roi ka par. Ngi don hangne ban ai ïa ka roi ka party sha baroh ki bynta jong ka jylla. Ngi don hangne ban pdiang ïa baroh ki nongmihkhmat lada ki kwah ban pynïasoh bad ka NPP mynta lane lashai ne hadien hynriew bnai ne hadien shi snem shwa ban kut ka samoi,” u la ong.
U Bah Tynsong u la ai jingmut ruh ïa ka seng Congress ba bishar bniah bad ban pynthymmai ïa ka kam ïing kam hapoh jong ka, da kaba ai jingmut ba ka jingbymlah jong ka party ban bat ïa ki MLA ka dei ka jingduna jong ka hi.
“Nga kwah ban ai jingmut ïa ka Congress ba kan sngewbha ban phaidien bad ban maramot noh ïa ka jingpei kaba heh,” u la ong.
Une u nongïalam ka NPP u la pynpaw ïa ka jingangnud jong ka party ban wanrah ïa ka roi ka par sha baroh ki bynta jong ka jylla, da kaba pdiang sngewbha ïa ki nongïalam ba la jied na kiwei pat ki party ban ïasoh bad ka NPP.
“Ngim don hangne ban pynjot ïano ïano. Balei ngin pynjot? Kam dei ban pynjot. Ngim don hangne ban pynjot ïa ka VPP, ban pynjot ïa ka HSPDP lane ban pynjot ïano ïano ruh kum kiwei ki sengsaiñ pyrthei kum ka UDP bad kiwei kiwei. Ngi don hangne kumba nga ong ba ngi duhthiah duh dem namarba ngi kwah ban pynpoi ïa ka roi ka party sha baroh ki Constituency ha ka jylla Meghalaya,” la bynrap shuh shuh u Bah Tynsong.
