Shillong, Nailar 01: Ki nongshong dukan die madan kiba don hapoh ka shatri jong ka seng Meghalaya and Greater Shillong Progressive Hawkers and Street Vendors Association (MGSPHSVA) ha ka sngi Thohdieng kila leit ïakhih da kaba shong kyllaiñ myngor hakhmat ka Ophis ka Shillong Municipal Board (SMB) namar ka kam pynkynriah ïa ki dukan madan na Khyndailad.
Kine kiba ïakhih ki la dawa ban pynlong noh mardor ïa ka jingïalang jong ka Provisional Town Vending Committee (PTVC) ban pynbeit ïa ka kam ba ïadei bad ka jingbym don ïa ki Certificate of Vending (CoV) sha kiba bun ki nongshong dukan madan ba dei hok ban ïoh ïa ki syrnot ha ka thaiñ Khyndailad.
Kane ka la wan jia hadien ka jingpynkynriah ïa ki nongshong dukan madan dangshen sha ka jaka pynïeng kali ha MUDA complex.
Ka Kong Angela Rngad, nongïalam ka Thma u Rangli-Juki (TUR) haba kren na ka bynta ka MGSPHSVA, ka la maham ba ki nongshong dukan madan ba ki lah ban pynjur ïa ka jingïakhih lada ym lah ban pynlong noh mar mar ïa ka jingïalang jong ka PTVC.
Ka la ong, “Ngi dawa ba ka PTVC ka dei ban shong jingïalang noh mar mar ban khmih ïa ki kam jong kito kiba shah pynduh ïa ki CoV watla ki dei kiba don hok ban ïoh shong dukan madan ha Khyndailad. Lada ym lah, yn pynbor ïa ngi ban pynjur ïa ki jingïakhih.”
“Ki dang don bun ki nongshong dukan madan ki ba dang dei ban ai ïa ki CoV. Kumno phi lah ban shu knieh noh ïa ka kamai jong ngi da bun bun taïew?. Katno ka eh ïa phi ban pynshisha ba ki dei ki nong shong dukan madan ba dei hok?. Namar kata, ka long kaba donkam ban khot ïa ka jingïalang ka PTVC namar ïa ka CoV ym lah satia ban shu ai da ka SMB. Lada ki khot ïa ki briew shimet shimet, ïathuh ïa nga ba mano ban khang ïa ki ban ai ïa ki CoV?. Ki lah ruh ban ai ïa ka CoV sha ki briew ki bym dei hok. Namar kata, ngi ban jur ba kane ka kam ka dei ban ïaid lyngba ka PTVC bad ba dei ruh ba buh bha ïa ki jingthoh namar ngim kwah ïa kano kano ka bamsap ne ka jingleh shiliang ha kane ka kam,” ka la pynpaw.
Ka la pyntip ruh ba kane ka seng ka la dawa ban shong pyrkhat biang ïa ka vending zone bad ban pynbeit biang ïa ki jaka shong jong ki dukan madan kiba donkam tang khyndiat eh ki jaka ban die kwai ne um.
Ka kong Angela ka la kynnoh ruh ba ka don ka jingbamsap ha ka pisa bad ka bor ha ka jingtei ïa ki dukan bad ki rynsan die jingdie jong ki nongshong dukan madan.
Ki nongshong dukan madan ki la kut jingmut ban pynbteng ïa ka jingïashong kyllaiñ myngor tad haduh ba ka SMB ka la mynjur ban khot ïa ka jingïalang jong ka PTVC.
Haba ïadei bad kane ka la ong ba ka jingkam ka SMB ba ki don kumba 1,400 ngut kiba die madan ka long kaba khlem da biang ka jingkheiñ bad ka association ka kyntait ïa kane ka jingai jingkheiñ ka tnat.
Ha kawei pat ka liang haba kylli, ka Kong Rangad ka la pynshai ba ka seng kiba die madan ka la ïakren bad mynjur khnang ban pynthikna ba kin ïoh jaka ha ka vending zone kaba ha MUDA.
Ka la ong ba ka association ka la kyntait ïa ka jingtyrwa ka sorkar ban pynkynriah ïa kiba die madan sha ka jaka ba shapoh ka MUDA.
Ka la pynpaw ruh ka jingbym sngewhun halor ka rai kaba marwei ba la leh da ki bor ba dei peit, kyrpang halor ka jingpynwandur bad ka jingai jaka ha MUDA.
Ka kong Rangad ka la pynpaw ruh ba ka association ka khlem leit ban shong ha ka jingïalang ka PTVC kaba la long ha ka 9 bad 23 tarik u Jylliew na ka daw ba ki don ki jingdkoh haba ïadei bad ka jingsam ïa ki certificate of vending (CoVs). Wat hapdeng ka jingbym treh ban ïashim bynta, ki bor ba dei peit ki la pynïaid shakhmat ïa ki kam ban shna ïa ki dukan khlem da kynjoh ktien ïa ka seng kiba die madan, ha kaba kane ka la lam sha ka jingmih ki jingkulmar bad ka jingsam kulmar ïa ki dukan bad jaka.
Katkum ka jingïathuh jong ka, ka seng kiba die madan ka la banjur ban don ka jingïashim rai lang halor ka jingpynwandur bad ka jingsam ïa ki dukan. Hynrei na ka daw ka jingshim rai marwei ka la lam sha ka jingbym sngewhun kiba die madan.
Ha kajuh ka por ka seng ka la kyntu ïa ka sorkar ba kam pat dei ban sdang pynkynriah ïa kiwei pat kiba die madan sha kiwei ki bynta jong ka Shillong khlem da ïoh ka jingmynjur jong ka PTVC.
