Shillong, Nailar, 01: U Symbud Myntri Rangbah ka Jylla uba khmih ïa ka tnat Kam Pohiing u Bah Prestone Tynsong u la pynpaw ïa ka jingsngewkhia halor ka jinghiar jurip jong ka KHADC dang shen ïa ka thaiñ Rani, kaba dang hap hapoh ka jaka ba ïakajia hapdeng ka jylla Meghalaya bad ka Assam.
Katkum ka jingong jong u, ka KHADC kam dei ban leit jurip khlem da pyntip sha ka Sorkar khamtam ba ka jingïakajia pud ka dang sah hapdeng ka jingpynbeit.
Ka thaiñ Rani ka dang dei ka bynta jong ka jingïakajia pud kaba la slem bha hapdeng ka Meghalaya bad ka Assam. Na ka liang jong ka Joint Regional Committee (JRC) na baroh ar tylli ki jylla kam pat shym la leit ban jurip ïa kane ka jaka bad ka jingsieh mawpud ka dang sahkut haduh mynta.
U Bah Tynsong u la ban jur ba kane ka jingleh jong ka KHADC ka lah ban nang pynjur shuh shuh ïa ka jingïakynad ha katei ka thaiñ.
“Ha ka jingshisha ha ka jingïalang la tyrwa ban pynlong tang ban pynshisha la kata ka jaka ka dei neem kaba hap hapoh ka Hima Jirang ne ka dei ka nongkynti jong ka Hima Sohiong.”
“Nga shimet nga sngew ba ka jingbakla ba la leh da ka KHADC ka long ba haduh mynta ym pat pynbeit ïa u pud u sam ka Hima, nga shimet nga sngew ba ka KHADC kam dei ban leit jurip. Ki la dei ban khot ïa ka jingïalang hapoh ka ophis, ban ïakren bad ban lum ïa ki kot ki sla baroh nangta ha kaba kut ban ïatreilang ym tang bad u Lyngdoh jong ka HIma Sohiong hynrei kan kham bha ban khot wat ïa u Syiem Nongspung bad ïa u Syiem ka Hima Jirang ban leit jurip lang, nga tharai ba kata ka dei ban long ka rukom,” u la ong ha ki lad pathai khubor.
“Hynrei ha kaba ïadei bad ka jingjia kaba la jia, nga ainguh ïa U Blei na ka liang ka sorkar ngi la pynjari ïa ka kyndon 144 CrPC lym kumta kan jin da la long da kawei pat ka khana,” bynrap biang u Bah Tynsong.
U Bah Tynsong u la pynthikna ba ka jingïakren ka dang ïaid hapdeng ki ophisar na baroh ar tylli ki jylla, kynthup ïa ki Deputy Commissioner bad ki Superintendent of Police.
“Ka jingïakren ka dang ïaid. Mano ba ong ba kam don jingïakren? Ha ka kyrdan jong ki Deputy Commissioner bad SP bad wat ha ka kyrdan jong u ADM ka Revenue ruh ka jingïakren ka don hynrei kam dei ka jingïakren saiñ pyrthei, ka dei ka jingïakren kaba thikna ban pynneh ïa ka jingshongsuk shongsaiñ la ka long ha ka Block I ne II ne ha baroh kawei ka jylla Meghalaya,” u la ong.
“Wat ha ka jingïalang jong u Myntri Rangbah bad ka jingïalang jong u Chief Secretary, kata ka dei ka jingbthah kaba shai kaba la ai da baroh ar tylli ki jylla. Dei na kata ka daw ba mynta kano kano ka jingjia kaba lah ban jia mardor la pynbeit bad khatduh ka la don hapdeng ka jingïapynbeit,” la bynrap u Bah Tynsong.
