Shillong, Nailar, 04: Ki nongïalam jong ka Federation of Khasi Jaiñtia and Garo People, West Jaiñtia Hills District Unit ha ka Lah Sngi u Blei ki la leit ban khynra ïa ki bar jylla kiba trei bylla ha ka Toll Gate, kaba don ha ka shnong ïalong, West Jaiñtia Hills ha kaba ki la lap ba ki don lai ngut ki bar jylla kiba ïohkam ha kane ka Toll Gate khlem da don ïa ka Labour Licence bad kiwei kiwei ki kot ki sla ba donkam.
Ha u kyrwoh ba la phah sha ki lad pathai khubor ryngkat bad ki video, u President ka seng u Bah Marhok Marboh u la ïathuh ba na ka liang jong ka seng ka la aipor tang 3 sngi ïa ki bor ba dei peit jong ka Toll Gate ban pynbiang ïa ki kot ki sla jong ki lai ngut ki nongbylla bar jylla hynrei lym kumta ka seng ka la maham lypa ba kam banse ban beh noh ïa ki sha ka jylla ba ki wan.
