Shillong, Nailar, 06: Ka Hynniewtrep Youths’ Council (HYC) ha ka sngi Balang ka la aiti ïa ka dorkhas sha u Myntri ka tnat Water Resouces u Bah Comingone Ymbon, da kaba kyrpad ban wad ïa ki lad ki lynti ban ïada ïa ka jingshah rong ka khyndew bad ïa ka jingshlei um ha ka thaiñ Shella, East Khasi Hills district.
Katkum ka jingong jong ka Council, ka thaiñ kaba don sharum ka wah Umïam ka ju shah ktah bha ha ka jingshlei um bad na ka jingtwa khyndew kaba ju pynjulor ïa ki jaka rep, ki mar ki mata bad kaba ktah ruh wat ïa ka jingim jong ki nongshong shnong.
“Kumta, ngi kyntu ïa phi, ba phin sngewbha ban shim ïa ki sienjam kiba kyrkieh bad kiba donkam ban khanglad ïa kane ka jingeh da kaba shna ïa ki jingker, ki kynroh bad kino kino ki jingtei ban ïada harud ka wah Umïam hapoh ka shnong Shella naduh ka thaiñ Pyrkan ki don sharum wah haduh Kalatek, hajan ka khappud Indo-Bangladesh, khnang ban ïada ïa ka rud wah bad ïa ka jingjulor ka khyndew,” ong u President ka HYC u Bah Roy Kupar Synrem ha ka shithi sha u Myntri.
Da ki hajar akar ki jaka rep ki la shah rong noh ha ka um bad ki mar ki mata ki la shah pynjot namar ka jingshlei um kaba ju jia man ka por bad ka jingtwa khyndew.
Ki trai jaka bad ki nongshong shnong kiba shah ktah ki ju pynsngew bunsien ïa kane ka mat sha ki bor ba dei peit, hynrei ki bor Sorkar kim ju shimkhia ïa kane ka jingeh, u la pynpaw.
Ha ka thaiñ Kalatek jong ka shnong Shella, kumba 19 hectare ka jaka ka la shah rong noh ha kine ki 10 snem ba ladep, kaba la wanrah ïa ka jingduhnong kaba khraw ïa ki jaka rep bad ki mar ki mata.
Kane ka la wanrah ruh ïa ka jinghiar ha ka jingmih na ka rep ka riang, ka jingkylla ktieh jong ki um ki wah bad ka jingpynjot ïa ka mariang baroh kawei bad ka la ktah ïa ka jingim jong kiba bun ki longïing kiba shaniah ha ki kam rep da kaba wanrah ruh ïa ka jingbym biang shuh ha ka bam ka dih, ong u Bah Synrem haba pyntip ba ka Meghalaya State Disaster Management Plan ka kubur ba ka don ka jingshlei um bad ka jingtwa khyndew.
“Kumta, ka long kaba donkam kyrkieh ba dei ban shim ïa ki lad ki lynti ban pynduna ïa kine ki jingma bad ban ïada ïa ki paidbah jong ka shnong Shella na ka jingduhnong kaba ki ju mad manla ka por namar ka jingshlei um bad ka jingtwa khyndew,” u la ong shuh shuh ha ka shithi.
