Shillong, Nailar, 07: U Myntri Rangbah ka Jylla u Conrad K Sangma dang shen u la pynsngew ha u Myntri ka tnat Kam Pohiing ka ri u Amit Shah halor ka jinglong nongshong shnong bad ka kam Visa kaba ktah ïa u Lyngdoh Sohblei uba kha shabar ri uba trei ha kane ka jylla.
Une u Lyngdoh Sohlei uba trei ha Nongstoin u la aplai ban ïoh long nongshong shnong ha ka ri India bad u Myntri Rangbah u la kyrpad ïa u Myntri ka tnat Kam Pohing ban bishar bniah halor kane.
“U (Amit Shah) la kular ïa nga ban ai haduh 10 snem ka Visa sha u Lyngdoh Sohblei khnang ba un ym donkam shuh ban pynthymmai manla u snem. U la don mynta 80 snem ka rta. Nga la pyntip ïa kane sha u Archbishop bad kumjuh ruh sha ki briew ba dei khmih ba kane ka dei ka kabu bad ki ruh ki sngewkmen ïa kata,” la ong u Sangma.
“Kane ka dei ka sienjam kaba bha tam namarba namar lada kata ka jingpynjlan ïa ka Visa la ai na ka bynta san-shiphew snem kan pynsuk ïa ki,” u la bynrap.
U Myntri Rangbah ka jylla u la ïakren ruh halor ka jingwan jngoh jong ka Rector General (Global Head) jong ka Jingïasyllok Salesian sha kane ka jylla.
U la ong ba ki Sister ka Jingïasyllok Salesian ki la kyrpad ïa u ban pyntip sha ka Ministry of Home Affairs bad sha ka External Affairs Ministry khnang ba kin dup wan rung da kaba suk namarba ka jingwan jngoh jong ki, kan long beit thik tang na ka bynta ki kam pynïaid skul.
“Ha ki por ba la dep, ki la don ki jingjia ha kaba katto katne na ki nongïalam niam kim shym la ïohlad ban wan rung shapoh ka ri bad kumta ki tieng bad ki khuslai lada kane ka jinglong kan wan jia biang watla ki don ïa ka Visa. Nga la ai ïa ka thup jong ki riewpawkhmat kiba dang thmu ban wan jngoh bad u Myntri ka tnat Kam Pohïing ka Sorkar Pdeng u la pynthikna ïa nga ba un sa peit hi dalade ïa kane ka kam,” la ïathuh u Sangma.
