Shillong, Nailar 10: Ka FKJGP, Garo Hills Zone ka la pynrem halor ki jingjia ha Garo Hills Autonomous District Council (GHADC) khamtam eh haba ki nongtrei kim ïoh satia ïa ka tulop la 43 bnai kynthih.
Ha u kyrwoh ba la phah da u President ka FKJGP Garo Hills Zone, Tura, u Pritam Arengh u la ong ba ka seng ka la ïohi ba ki nongtrei ka GHADC kim pat ïoh satia ïa ka tulop kaba la long kumba 43 bnai, ha kaba kane ka dei ka kam kaba ym pat ju ïohi bad ïohsngew ha kiwei ki jaka treikam hapoh ka ri India.
“Ngi la ïohi ruh ba ka jingsiew slem ïa ki tulop sha ki nongtrei ka GHADC kam dei shuh ka kam kaba dang thymmai bad kane ka la jia teng naduh ki por kiba mynshwa. Ha ki snem kiba mynshwa la ïohi ba ka jingslem ban siew tulop ka long tang kumba 5 haduh 6 bnai hynrei ha kane ka por kaba mynta ka la long shaba palat ha kaba ka la poi haduh 43 bnai. Kane ka jingjia na ka liang ka seng kam kwah satia ban kynnoh ïa kano kano ka Executive Committee (EC), hynrei la ïohi ba manla ki EC kiba synshar naduh ki por kiba mynshwa kim lah satia ban pynbeit ïa kane ka jingeh bad ngim pat ïohi ruh ïa ki sakhi ba ki seng saiñ pyrthei lada dei na Garo Hills ne na kiwei ki ban shim khia ban pynbeit ïa kane ka jingeh, ha kaba mynta hap mad jingeh da ki nongtrei kane ka jaka treikam,” bynrap u Pritam.
Ka seng ka la ong ruh ba ha ka 7 tarik mynta u bnai na ka liang ka Non-Gazetted Employees Association (NGEA) ka GHADC ka la sdang ka jingïakhih da kaba shong kyllaiñ myngor da kaba sangeh ruh ban trei ïa ki kam jong ki, da kaba dawa ba la kumno kumno dei ban pynlait shwa ïa ki tulop kiba 12 bnai.
“Kane ka EC kaba mynta ruh kam lah ban pynbeit ïa ki jingeh jong ki nongtrei bad kumba ka long haduh mynta ki nongtrei ki hap shong kyllaiñ myngor hakhmat ka ophis GHADC da kaba sangeh ruh ban trei ïa ki kam jong ki. Kane ka jingïakhih jong ki, ka la ktah ruh ïa ki nongshong shnong na ka thaiñ Garo Hills haba ki wan donkam sha kane ka jaka treikam, kum ki jingdonkam ïa ki kot ki sla na GHADC,” bynrap u nongïalam ka FKJGP.
U la pynpaw ruh ba dangshen u Myntri Rangbah ka jylla u la kren halor kane ka kam, da kaba ai daw ruh ba ka jylla ka don duna palat ka lad ban tuklar ïa ka jingtreikam ha ki ADC bad ula kyntait ruh ban kren eiei halor kane ka kam kaba la ktah bha ïa ki paid Garo.
“Kane ka jingkren jong u Myntri Rangbah ka la wanrah kum ka jingkyndit ïa baroh, ha ka jingshisha u la dei ban pynbeit ïa kane kam dalade hynrei u khlem shimkhia khamtam ban pynbeit ïa ka jingeh ba la mad da ki nongtrei ha kaba ïadei bad ka jingbym ïoh tulop jong ki,” ong u nongïalam ka FKJGP.
Ka FKJGP, Garo Hills Zone ka la pynpaw ruh ba kane ka jingeh ym dei ban shim kum ka kam ïalehkai ha ka saiñ hima sima hynrei dei ban shim ka lad ban pynbeit ïa kane ka jingeh bad ban wanrah ki rukom treikam kiba thymmai kiba wanrah ïa ka khuid ka suba ha GHADC.
Ka seng ka la ong ruh ba ka long kaba kloi ban ai ki jingmut sha ka EC (GHADC) ha kaba ïadei bad kane bad kyntu ruh ïa baroh ki seng saiñ pyrthei, bad ki seng bapher bapher ban shim khia lem ha kaba ïadei bad kane ka jingeh ba mad da ki nongtrei ka GHADC.
