Shillong, Nailar, 11: Ka Khooid Ya Ka Wah Myntdu ha ka sngi Saitjaiñ jong ka taiew baladep ka la lum da ka jingïalang bakyrpang ha Yungwalieh, Chilliang Raij ïa ki nongïalam shnong jong ka sor Jowai, kynthup ruh ïa ki kynhun bapher bapher ban ïathir bad ban ïatai sani kumno ban pynneh pynsah ïa ka wah Myntdu kaba la sdang ban ring swai katba nang ïaid ki sngi.
U President ka Seng u Bah Khroo L. Pariat u la pyni ruh ïa ki sakhi sabut halor ka jingshah ktah jong ka wah Myntdu ha kine ki sngi namar ka jingshna ïa ka surok.
U la ïathuh ba ki nongïalam ka seng ki dang ap sa tang ïa ka rai na ka National Green Tribunal hadien ba ladep ban ujor halor ka jingshah ktah jong ka wah Myntdu bad shen ki nongïalam jong ka seng kin sa leit sha Delhi ha ka 22 tarik Nailar, 2025 namarba ka jingujor jong ka seng ka la poi ha ka Principal Bench jong ka National Green Tribunal.
Ha kane ka jingïalang la shim ruh ïa ka rai ban kyrpad ïa ki trai jaka kiba don harud ka wah Myntdu ban pynneh pynsah ïa ki jaka bad ki khlaw ki btap khnang ban ïoh kham bun ka um.
Ka jingïalang ka la shim ruh ïa ka rai ban pynsngew sha u Myntri Rangbah ka Jylla u Conrad K Sangma bad sha u Symbud Myntri Rangbah u Bah Sniawbhalang Dhar ban ithuh noh ïa ka wah Myntdu khnang ban ïada ïa ka wah na ka jingshah pynjulor.
