Shillong, Nailar, 14: Ki nongïalam jong ka Meghalaya SSA School Association (MSSASA) ha ka sngi Palei ki la aiti da ka jingthoh ha u Director ka School Education and Literacy u Bah Banteilang J. Kharshandi da kaba ai jingmut ba ka tnat pule puthi kan pynjanai ïa ka jingpyntreikam ïa ka Meghalaya School Information Management Systems (Megh-SIMS).
“Ynda ngi la peit ïa ka Megh-SIMS portal, haoid, ngi ïaroh ïa ka jingshimkhia jong ka Sorkar ban wanrah ïa ka jingtreikam kaba khuid bad suba ha kaba ïadei bad ka jingsiew ïa ka tulop sha baroh ki nonghikai. Hynrei ki don katto katne ki mat kiba ngi kwah ban ai jingmut ïa ka Sorkar ba kin pynbha shuh shuh ha kaba ïadei bad kane ka Portal,” la ong u President ka MSSASA u Bah Aristotle Rymbai ha ka jingïakren bad ki lad pathai khubor ha Shillong Press Club.
Katkum ka jingpynbna ba la pynmih da ka DSEL ha ka 16 tarik, Naitung, 2025 la pyntip ban pyntreikam ïa ka Budget and Fund Requirement na ka bynta ban siew tulop ïa ki nonghikai lyngba ka Meghalaya School Information Management Systems (Megh-SIMS).
Ïa ka shithi jingpynbna la phah da u Director ka School Education and Literacy sha baroh ki District School Education Officer (DSEO) ban pyntip sha baroh ki skul hapoh ka jylla ba ka jingpyllait ïa ka tulop nangne shakhmat kan long beit lyngba ka Megh-SIMS portal.
U la ïathuh ba ha ka jingïakynduh ïa u Director ka seng ka la pynpaw ïa ki katto katne ki bynta ba don ki jingbakla ha ka Megh-SIMS Portal kaba ïadei bad ka tarik ba ki nonghikai ki rungkam, ka jingbakla spelling ïa ka kyrteng ki nonghikai bad ki don ruh ki nonghikai kiba ka kyrteng kam shym la rung ha ka Portal.
U la ong ruh ba u Director u la pyni ïa ka jingbatai kaba bniah nadong shadong ba kumno ka Portal ka treikam.
Ha kaba ïadei bad ki jingeh ba la pynsngew, u Director u la kular sha ka seng ba kin pynmih sa kawei ka App ha kaba ki nonghikai ba ïa kynduh jingeh kin phah ïa ki jingujor lyngba ka SIMS Help Desk.
“Ynda ka tnat ka la ïoh pdiang ïa ki jingujor yn sa pynrung ha ka Megh-SIMS khnang ba ki jingtip kiba bniah baroh kin long markumjuh bad ka UDISE,” u la ong.
“Ngi pyntip sha baroh ki nonghikai SSA ba kim dei ban leh kyrkieh halor kane ka kam watla yn pyntreikam ïa ka Megh-SIMS portal naduh u bnai Nailar terter,” la ong shuh shuh u Bah Rymbai.
U la pyntip ba u Director u la ïathuh ba ka tulop jong u bnai Nailar, Nailur kat long katkum ka jingsiew tulop kaba rim bad naduh u bnai Risaw ter ter yn sa pyntreikam pura ïa ka Megh-SIMS.
“Ka jingbuh por haduh u bnai Risaw ka long ban ailad ïa ki nonghikai ba kin pyntip ïa ki jingeh lyngba ka SIMS Help Desk ban sa pynmih paidbah ha ki khyndiat sngi khnang ba ka Sorkar kan dup lah ban pynbeit ïa ki jingbakla hapoh ka Megh-SIMS portal.
U Director u la pyntip ba ka don ka Official YouTube Channel jong ka tnat pule puthi ka Sorkar Meghalaya kaba la thep ïa ka Tutorial Video ba la batai bniah kumno ban pyndap ïa ka Form jong ka Budget and Fund Requirement ha kaba ïadei bad ka jingsiew tulop sha ki nonghikai lyngba ka Megh-SIMS.
