Shillong, Nailar, 18: Ka lympung ïalehkai phutbol kaba la tip kum ka Samkhamti Summer Futsal League kaba la long ha ka 16 tarik mynta u bnai ka la poi noh sha kaba kut ha kaba la pynïalehkai ha ki 4 tylli ki jingïakhun Final kata ha ka Children’s League Under 10, ka Samkhamti Veteran league, ka Samkhamti Women’s League bad ka 4th edition Samkhamti Independence Cup.
Ïa kane ka jingïalehkai la pynlong ha Hellick Lina Mini stadium kaba don ha ka shnong Mawlai Mawdatbaki.
Ka jingïalehkai ha kane ka sngi ka la long shisha kaba shongshit bha ha kaba la sakhi ruh ïa ka jingwan tuid jong ki nongkyrshan bad kumjuh ruh ki nongshong shnong ban wan ai mynsiem ïa la ki jong ki kynhun kiba ïakhun ha ka Final.
Ha ka jingpynkut ïa kine ki jingïalehkai la donlang ruh u Rangbah Shnong jong ka shnong Mawdatbaki u Bah George Kharmujai, u Secretary Shnong u Bah Bhabok Kharkulia bad kiwei kiwei.
Ha kaba ïadei bad ka final jong ka Children’s League Under-10 ka Mawreng Football Academy ka la pynliem noh ïa ka Umphyrnai Coaching Centre da ka jingïashoot tie breaker bad ïa ka khusnam Best goalkeeper la ïoh da u Heprit Batskhem Kurbah na ka Mawreng bad ïa ka Golden Boot la ïoh da u Heprit Roniki Kharshandi na ka Mawreng bad ïa ka nam Player of the tournament la ïoh da u Heprit Bashemphang Diengdoh na ka Mawreng Football Academy.
Ha ka Final Veteran League ka Meghalaya Police Football Veteran ka la pynliem noh ïa ka Frenco United da shi goal la nod bad ïa ka khusnam best goalkeeper la ïoh da u Bah Rikseng Sangma na ka Meghalaya Police bad ïa ka Golden Boot la ïoh da u Bah Sankupar Mawlong na ka Frenco united bad ïa ka nam Player of the Tournament la ïoh da u Bah Marshall Kurkalang na ka Meghalaya Police Football Veteran.
Ha ka Final jong ka Women’s League ka Ala-ïa-Isa Sports Club ka la pynliem noh ïa ka Rangdajied United da ar kol la kawei, ïa ka khusnam best goalkeeper la ïoh da ka samla Prinyanka Latam na ka Ala-ïa-Isa Sports Club, ïa ka Golden Boot la ïoh da ka Samla Eiladki Ksoo na ka Rangdajied United bad ïa ka nam Player of the tournament la ïoh da ka Catherine Kharkongor na ka Ala-ïa-Isa Sports Club.
Ha ka jingïakhun jong ka 4th Edition Samkhamti Independence Cup ka Kemidon FC ka la jop ïa ka Bomlaiñ FC da lai la ar kol bad kane ka kynhun ka la ïoh rah ïa ka song pisa kaba 70 hajar ryngkat ka trophy. Ïa ka nam best goalkeeper la ïoh da u Samla E Warbah na ka Kemidon FC, ïa ka Golden Boot la ïoh da u samla BaïaiKara Swer na ka Lamborghini FC bad ïa ka Player of the tournament la ïoh da u samla F.Lyngdoh na ka Kemidon FC.
