Shillong, Nailar 18: Ki dkhot jong ka Organising Committee ka Khasi Students Union (KSU) Central Executive Committee ha ka Lah Sngi u Blei ha ka por kumba 6:00 baje haduh 6:30 baje janmiet, hadien ba ki la ïoh ujor na ki paidbah, ki la leit ban thwet ïa ki samla kiba ju mlien ban die ïa u drok sha ki nongdih drok ha kyndong jong ka lynti ban leit sha Lady Keane College, Shillong, Keating Road, Shillong.
U Asst. Organising jong ka KSU Central Executive Committee u samla Glinstar Shabong ha ka jingïakren bad u nonglum khubor jong ka Batesi TV u la ïathuh ba katkum ka jingphla jong ki nongdie ïa u drok ki ju thied na ki briew kiba wan die hajan ka dukan Ajmera Marble.
Na ka met jong ki ar ngut ki nongdie drok ki dkhot ka KSU ki la ïoh kurup ïa u drok ba la thep ïa ki 15 tylli ki tyndong, 7 tylli ki thyrnia injekshon bad sa uwei u maw ba la teh da ka jaiñ ïa kaba uwei na ki nongdih drok u la phla ba u ju pyndonkam ban tied ïa kino kino kiba ïakhun pyrshah ïa u.
Nalor ki arngut ki nongdie drok, ki dkhot ka KSU ki la ïoh bat sa ïa lai ngut ki nongthied drok kynthup ïa uwei u nongniah local taxi.
Hadien kane, ka KSU ka la pyntip noh sha ki Pulit ka Anti Narcotic Task Force ban shimti noh ïa kine ki nongdie bad nongdih drok ban ïalam sha thanat bad ban pynngat ha ki kyndon aiñ.
