Shillong, Nailar, 19: U Myntri ka Sorkar Jylla uba dei u nongïalam ka BJP u Bah AL Hek u la pynpaw ba ka Sorkar Jylla ka la shim khia ban weng ïa ka jingbym ïoh tulop jong ki nongtrei ka Garo Hills Autonomous District Council (GHADC) ha kine ki 43 bnai ba ladep.
Haba jubab ïa ka jingkylli, u Bah Hek u la ong ha ki lad pathai khubor ha ka sngi Baar, “ngam ong ba ka Sorkar Jylla kam shym la leh eiei ban pynbeit ïa katei ka jingeh. Ngi don ïa u Myntri Rangbah bad u Symbud Myntri Rangbah ba peit ïa ka District Council Affairs bad la leh ïa la ka kamram ban (pynbeit ïa katei ka jingeh).”
Hynrei u Bah Hek u la banjur ba ka jingsiew tulop ka dei ka jingkitkhlieh jong kano kano ka shlem treikam ne ka Sorkar ne ka District Council.
Haba kylli, u Myntri u la ong, “ngam tip kumno ki (ADC) siew ïa ka tulop lyngba ka jingïoh lum khajna jong ki ne la siew da ka Sorkar.”
Katkum ka jingong jong u, dei ban wad ïa ki jingshisha kaei kaba la jia baroh shikatta.
Ha kaba ïadei bad ka rai jong u MDC ka BJP na Tura u Bernard N Marak ban pan jingïarap na u Myntri Rangbah ka jylla Assam namarba u la ailad ïa ka party ban shimti ïa ka synshar khadar ha GHADC, u Bah Hek u la ong ba ban rah ïa ki jingeh jong ki sha ki bor ba halor kam dei satia kaba bakla.
“Ki (nongïalam party) ki la leit pyntip sha u Lat, ki la ai jingtip sha u Myntri Rangbahduh bad sha kiwei kiwei ki Myntri Rangbah. Kumta ban ai jingtip sha ki bor ba halor kam dei ka kam kaba bakla. Ki lah ban leit sha kino kino ki bor ba halor, kata kam dei ka jingeh,” u la pynpaw.
