Shillong, Nailar, 21: U drok ba shongdor palat T. 412 klur la ïoh ban kurup ha Meghalaya ha ki san snem ba la leit noh bad da ki phew spah ngut ki briew ki la shah kem halor ka jingdonkti ban khaii tuh.
U Superintendent of Police (SP) uba khmih ïa ka Anti-Narcotics Task Force (ANTF) u Giri Prasad u la ong, tang hapdeng u snem 2020 bad 2025, ka tnat Pulit ka la ïoh kurup 400,993 gram u drok heroin, 12,756 kilo u Ganja, 2,79,636 kilo u Opium, 76 kilo ki dawai kuli yaba, 14 kilo u White Crystal Meth bad 1,24,906 bilor ka dawai jyrhoh Codeine Cough Syrup.
U Prasad u la ong ba ka jingïoh kurup ïa ki jingdih pynbuaid ki dei kiba shongdor palat T. 412 klur bad kumba shiteng na ki mar khaii tuh la lah ban pynjulor katkum ki kyndon jong ka aiñ.
