Shillong, Nailar 22: Ka Khun Hynñiewtrep National Awakening Movement (KHNAM) ha ka sngi Thohdieng ka la dawa ïa ka Sorkar jylla ba kan ïakren bad ka Sorkar Pdeng ban pynkylla ïa ka Presidential Order 1950 kaba ïadei bad ka thup Scheduled Tribe (ST) ka jylla Meghalaya.
Ha ka shithi sha u Chief Secretary u Bah D P Wahlang, u Working President ka KHNAM u Bah Thomas Passah ula ong ba ka party ka la kyntu ïa ka Sorkar Jylla ban bthah ïa ki bor ai Scheduled Tribe ka Jylla ba kin bud thik ïa ki kyndon ba la pynmih da ka Ministry of Hime Affairs (MHA) ba la pynmih ha u snem 1975 bad 1977 bad ban phah ktien sha ki tnad Sorkar Pdeng ban pynthikna ba kin ai ïa ka bhah ST ka jylla Meghalaya kaba dei tang ïa ki trai ri trai muluk kiba shong ba sah ha jylla kata ki Khasi, Jaiñtia bad Garo.
“Ngi kyntu ïa ka Sorkar ba kan bthah ïa ki bor ba ai ST ba kin pdiang ïa ki jingujor pyrshah ïa ki briew ba don jingartatien ba la ïoh syrnot ST ha ki snem ba la leit noh bad ban pynduh noh ruh ïa ka hok ST hadien ba la pynshisha bha ïa ki kot ki sla,” ong u Bah Passah ha ka shithi.
U la ong ba katkum ki kyndon ka MHA, u briew u lah ban kam ba u dei u SC/ST ha la ki jaka shong bad ki briew ba phet ne kynthi na kawei ka jylla sha kawei pat kim lah satia ban kam ïa ka hok SC/ST ha ki jylla thymmai satang lada ki dei na kajuh ka Jaitbynriew ha kata ka Jylla.
Ka la ong ruh ba ki briew kiba ïashong kurim ba kiba dei na ka Jaitbynriew SC/ST kin ym lah ban long ki dkhot jong kata ka Jaitbynriew.
U Nongïalam ka KHNAM ula kynnoh ba ïa kine ki kyndon ym shym la pyntreikam ha Meghalaya, kaba lam sha ka jingpyndonkam bakla ïa ki syrnot ST da ki briew ki bym dei ki trai ri trai muluk jong ka Jylla.
Na ka liang jong u, u la kdew ruh ïa ki khep ba ki briew ki la pynkylla ïa ki kyrteng bad ki jait ban kam ïa ka hok ST.
U la ong, “La shem ruh ba ki don ki khep ha kaba ym shym la pynshisha bha ïa ki kot ki sla haba ai ïa ki syrnot ST ha Jylla Meghalaya, nalor kata, ki jingmyntoi ST kiba dei ban ïoh tang ki trai shnong ki Khasi, Jaiñtia bad Garo ba sah ha Jylla la pynïoh ruh ïa ki riewlum ba shu wan shong shnong na kiwei ki Jylla bad ba shu sah tang shipor ha Jylla. Kane ka la paw bha haba don ki bhah ha ka thungkam ïa ki ST ha ki tnad ka Sorkar Pdeng ha Jylla.”
U Bah Passah u la ong ba ka KHNAM ka la shem ba ki don bun ki khep ha kaba ki briew kila pynbna ïalade hakhmat u Notary Public bad pynkylla ïa ka kyrteng bad ka jait kum ka nuksa Ruksana Parbeen (Muslim) sha ka Evaline Sumer (Khasi), Momin Khezar sha u Erick Sumer. Ula ban jur ba kum kine ki jingeh ki buh ha ka jingma kaba khraw ïa ka Jaitbynriew bad ka long pyrshah ruh ïa ki kyndon jong ka MHA.
Haba kdew sha ka raly thungkam ba kyrpang ki BSF na ka bynta ka kam constable (GD) ïa ki ST ha Meghalaya, u Bah Passah ula kyntu ïa u Chief Secretary ban ïakren bad ki bor shipai BSF ban pynthikna ba tang ki jaitbynriew Khasi, Jaiñtia bad Garo ka Jylla ki dei kiba la kheiñ kum ki ST na ka bynta kane ka rally ka ban long kat kum ki kyndon ka Ministry of Home Affairs.
