Shillong, Nailar, 29: U Myntri ka tnad Labour ka sorkar jylla u Bah Shakliar Warjri ha ka sngi Thohdieng u la ong ba ka Sorkar kan nym khein sting ïa ka jingshngain bad ka jingmyntoi jong ki trai ri trai muluk haba ai ïa ki labour license sha ki nongbylla bar jylla ki bym don ïa ki kot ki sla.
Ha ka jingïakren bad ki ladpathai khubor u Bah Warjri u la ong ba ki nongbylla nabar ka jylla ki dei ban aplai ïa ki laisen lyngba ka official web portal bad ban aiti ïa baroh ki kot ki sla kiba donkam bad khlem ki kot ki sla kiba biang, yn ym ai satia ïa ka laisen.
Ha kaba ïadei bad ka jingpynpaw jong ka HYC ïa ka jingsngewkhia halor ki Acknowledgement Slip bad ki Registration Card kiba la shu leh thok lane kiba la ïoh beaiñ, khamtam eh ha Byrnihat, u Bah Warjri u la ong ba un sa khot ïa ka jingïalang ban bishar bniah ïa kane ka kam.
