Shillong, Nailur, 04: U Kynum jong uwei u trai ka hotel u la shah kem ha ka sngi Palei ha ki Pulit ka kynhun Anti-Narcotic Task Force (ANTF) ha kaba ïadei bad ka jingïoh kurup palat 10,000 hajar tylli ki dawai kuli Yaba ha nongbah Shillong.
U Labius Aregh, uba dei u Kynum jong u trai ka Hotel City Palace ha Lapalang u la shah kem hadien ka jingai jingtip jong uwei u briew uba la tip kyrteng kum u Salnang M Sangma, uba la shah kem ryngkat bad ki 6,000 hajar tylli ki dawai kuli Yaba na kawei ka kali Renault Duster (ML05 R 6828) ha Sawlad Madanrting ha ka miet sngi Balang, la ong ki Pulit.
Ha ka jingtohkit la ïoh kurup shuh shuh sa 4000 hajar tylli ki dawai kuli Yaba napoh ka hotel, ki la ong.
U Aregh mynta u dang don ha along jong ki Pulit.
Ïa ka case la register bad ka jingtohkit ka dang ïaid shakhmat ban lap dien shuh shuh halor kane ka jingïoh kurup ïa ki jingdih pynbuaid ba la ñiew beaiñ.
